Марий Элын Тазалыкым аралыме министерствыжын 15 октябрь эрдене увертарымыж почеш, пытартыш суткаште регионысо инфекционный стационарла гыч паремше 81 пациентым мӧҥгӧ колтымо, тыгодымак 106 черлым эмлалташ пыштыме. Тыге, теҥгече эрдене республикнан 9 инфекционный стационарыштыже 763 еҥ COVID-19 деч эмлалтын, ты чот гыч 159 черле неле состоянийыште лийын, 14 пациент шодым искусственно вентилироватлыме йӧн дене шӱлен, 317 еҥ – кислород полшымо дене.
Эн шуко черле, 230 еҥ, Йошкар-Оласе больницыште эмлалтеш, Медведево районысо рӱдӧ больницыште – 156 пациент, Оршанке районысо рӱдӧ больницыште – 78, Волжск оласе рӱдӧ больницыште – 72, Сар-влакын ветераныштын республикысе клинический госпитальыштышт – 68, Марий Турек районысо рӱдӧ больницыште – 66, Козьмодемьянск район-влак кокласе больницыште – 53, Звенигово районысо рӱдӧ больницыште — 33, Йоча республиканский клинический больницыште – 7 икшыве.
«Коронавирус: статистика» сайтын 15 октябрьысе данныйже почеш, пытартыш суткаште Российыште COVID-19 дене 13754 граждан черланен, Марий Элыште – 39 еҥ. Коронавирусын пандемийже пагытыште республикыштына чылаже 5321 еҥ черланен, 57 черле колен.
Аралыза шкендам да лишыл еҥда-влакым: общественный верлаште маске ден перчаткым чийыза, киддам шовын дене чӱчкыдын да сайын мушса, тыгай йӧн уке гын, антисептик дене пайдаланыза, тӱрлӧ витаминлан поян продуктым кочса.
М.ИВАНОВА
