Снимкыште ончыктымо кок пöръеҥым Звенигово районысо Красногорский посёлко – Кугу Шигак шÿгарла кугорнышто кажне кечын гаяк 8 гыч 10 шагат марте ужаш лиеш. Тиде жапыште нуно шÿгарла велыш але посёлкыш скандинав йöн дене ошкылыт.
Красногорский посёлкышто илыше Александр Григорьевич Водянов ден Кожласола ял гыч Василий Алексеевич Чугунов 73 ияш улыт. Пöръеҥ-влак изинек келшен илат. Мутышт почеш, тидлан родо-тукым кылат сай йöным ышта. Пенсионер-шамыч радамыш шукертак ушненыт. Ик кечын нуно яра жапым арам эртарыме деч скандинав йöн дене кошташ кутырен келшеныт. Тидлан лÿмынак тоям, келшыше вургем ден йолчиемым налыныт да «маршрутыш» лектыныт. Сай игечыште шым километр марте коклам ошкыл эртат, ударак годым – визыт деч утларакым веле. Тыгеракын ынде кум ий коштыт.
– Ме вет ийготым веле огыл, тÿрлö черымат ситышынак погенна, сандене тазалыкым эскерыде огеш лий. Скандинав йöн дене кошташ тÿҥалмына деч вара шкенам палынак сайын шижына: капкылланат куштылго, йÿдымат сайын малена, аппетитат уда огыл, кумылат нöлтшö, – шыргыжалын мане Александр Григорьевич.
– Мый гын тыланда 73 ийым низаштат ом пу ыле, – когыньыштымат шинчам дене аклен, шонымем каласышым.
– Пеш тау. Такшым… моло еҥат «73 ияшла огыда кой» маныт, – нöлталтше кумылжым ыш шылте Василий Алексеевич.
Снимкым ыштыме кечын, 10 мартыште, уремыште иктаж 25 градус йÿштö ыле. Пундашдыме канде кава гыч чевер кече шыратен ончен. Кумда пасушто лум чинчын-вунчын чолгыж киен. Лопкан да йытыран эрыктыме кугорнысо лум йол йымалне кычыр-кочыр, кычыр-кочыр кочыртатен. Кугорно кок велне пырдыжла шогышо ош куэрын парчаже шыма мардежын толкыныштыжо модын. Ала-кушто киса, шошо лишеммым ушештарен, вичкыж йÿкын мурен… Теве тыгай сылне пÿртÿсыштö йÿштеш чевергыше шÿргывылышан кок пöръеҥ скандинав йöн дене йомартлын ошкылын да мутым вашталташ кумылым луктын.
М.ИВАНОВА
Авторын фотожо
