1 июньышто Марий самырык театрыште «Изимӧр пеледыш» республикысе йоча пайрем лийын. Тудым Марий тӱвыра рӱдер ден Мер Каҥаш эртареныт.Ты гана тушко кундемнан ик эн чолга, пӱсӧ уш-акылан 200 наре ӱдыр-рвезе чумырген. Нунын коклаште меат лийын ончышна.
Эн ончычак мутым республикысе Марий тӱвыра рӱдерым вуйлатыше Римма Алексеевна Юрьева дене вашталтышна. Тудо тыге каласыш:
– Тыгай пайрем 2013 ий гычак эртаралтеш. Кугыеҥ-влаклан – Пеледыш пайрем, йоча-влак – «Изимӧр пеледыш». Тек кушкын толшо тукым изинекак марий пайремлан шӱман лиеш, шочмо марий йылмыжым ок мондо. Марий самырык театрын ончыктымо спектакльже полшымо дене илышыште вашлиялтше сай ден осалым ойыраш, поро лияш, икте-весым пагалаш тунемеш. Тышке погынышо йоча-влак тунемме идалык мучко сайын тунемыныт, тӱрлӧ конкурсышто да олимпиадыште шкем сай могырым ончыктеныт. Таче ме нунын деч нимом огына йод – тек ласкан канат, вет 1 июнь – Йоча аралыме тӱнямбал кече. Вес ийын ты пайрем могай лиеш, тачысым ончен иктешлена, ӱдыр-рвезе-влак деч йодыштына.
Мероприятий тӱҥалтыште икшыве-влаклан модышым эртареныт. Нуным Поҥго, Шогертен, Шукш, Пеледыш, Вувер-кува, Кеҥеж модыктеныт. Тидын деч вара Марий самырык театрын артистше-влак В.Абукаевын «Каза, тага да пырыс» йомакше почеш спектакльым ончыктеныт. Мыйын шонымаште, ончышо-влак тудо моткоч келшен, вет герой-шамыч мутланеныт гына огыл – муреныт, куштеныт. Тидын деч вара чылаштымат театрын фойештыже «Шовын шӱвыроҥ» пайрем да мучашлан эн йӧратыме кочкыш – мороженый – вучен.
Теве ме Медведево район Пекшиксола школын тунемшыже-влак деке лишемна. Таче тушто марий йылмым да литературым туныктышо Г.Петрова дене пырля 7 ӱдыр-рвезе толын. Тиде – Д.Миковорова, К.Тихонова, М.Благодаров, А.Токмалаев, А.Кропинов да В.Чучелина.
– Нине ӱдыр-рвезе марий йылмым «4» да «5»-лан тунемыт, но коклаштына «3»-лан тунемшат уло. Тек нуно моло школысо икшыве-шамычым ончен, икте-весе дене марла шукырак мутланаш, марий йылмым пагалаш, шке калыкым йӧраташ кумылышт лиеш, – каласыш Галина Алексеевна.
Мутат уке, Шернур район Лажъял школ гыч толшо да изи шӱдырла волгалтше ӱдыр-рвезе-влакым гын йӧршынак тыглай эртен каяш ок лий, но нунын нерген газетын вес номерыштыже лудса.
Г.Кожевникова.
М.Скобелевын фотожо.
