Шукерте огыл «Россий ДОСААФ-ын Йошкар-Оласе технический рӱдерже» тоштерыштыже мотогонко дене СССР-ын спорт мастерже, Марий АССР-ын да Йошкар-Олан кок гана чемпионжо Юрий Васильевич Грязинлан бюстым почыныт.
Ю.Грязин Кужэҥер районысо Изи Савэҥер ялеш шочын. Ялеш шуаралтын кушмыжо рвезылан службым эртымыж годым полшен. Рядовой Грязиным частьын мотогонщик командышкыже налыныт. Сай результатышкыжат пеш писын шуын. Совет Армийыште службым эртымыж годым (1957-1960 ийла) 1959 ийыште танковый многоборье дене (М-72 классыште) Закавказский военный округын чемпионжо лийын. «Мастер-водитель танка» лӱм дене палемдалтын. Икымше гана стартыш 1960 ийыште мотокросс дене Марий АССР-ын первенствыштыже К-750 мотоцикл дене ДОСААФ-ын флагше ден лектын, чемпион лийын. Варажым тӱрлӧ кӱкшытан ятыр таҥасымашлаште вийжым терген, чемпион лийын, призёр радамыш логалын. Эн ӱшанле штурманжылан Нина пелашыже шотлалтын. Могай тактикым налме шотышто чылажымат пырля каҥашеныт. Тренерже – Альберт Иванов. Шке мотоциклжым эстафете семын самырык спортсмен Александр Логиновлан пуэн. Ю.Грязин 36 ий нимогай аварий деч посна дальнобойщик-автоводительлан ыштен.
2014 ий 5 апрельыште илыш гыч каен.
Е.Эшкинина
