ПАТЫРЛЫК

Порысым шукташ – тӱрлӧ войскаш

Шошо призыв тӱҥалын. Тудо молгунамсе семынак 1 апрель гыч 15 июль марте шуйна. Тений республикыште 600 (18 гыч 27 ияш марте) утла самырык еҥ салтак радамыш шогалаш ямдылалтеш.

25 апрельыште Йошкар-Оласе Воин Чап монумент воктеч икымше тӱшка призывник-влакым службым эртыме верышкышт торжественно ужатат.  

Марий Элын сборный пунктыштыжо журналист-влаклан эртыше пресс-конференцийыште салтакыш налме радам, у вашталтыш нерген ойленыт.

– Призыв молгунамсе семынак эрта. Сборный пунктышто кажне призывниклан персональный электрон картым ямдылат. Тушто тудын  нерген шуко  информаций лиеш. Тыгак несессорым (19 предмет) кучыктат, службым эртыме вер марте кочкыш паёкым пуат.

 Вашталтыш шуко огыл, но уло.  Мутлан, ончыч отсрочкым ик гана пуэныт гын, кызыт – ныл гана. Училищым, вузым тунем лекташ, магистратурышто шинчымашым келгемдашат йєн уло. Альтернативный службым таче кечылан (2003 ий гыч) 72 еҥ эртен. Шошо призывыште ик рвезе почто сферыште пашам ышташ тӱҥалеш. Тыгак армийлан йӧрдымӧ але иктаж черлан кєра салтак радамыш логалдыме рвезе-влак, уэш медосмотрым эртен, шке кумылын салтак радамыш каен кертыт, – мане республикын военный комиссарже С.Сидоркин. – Спорт мастер нормативым шуктышым, элнан сборный командыштыже улшым, спорт ротыш ойырат. Шыже призывыште тыгайже ныл еҥ лийын гын, кызыт – ик рвезе.

Тӱҥ шотышто ты ганат шукышт сухопутный войскашке логалыт, кажне визымше – военно-космическийышке. Тыгак ВДВ-шке, ракетный войскашке, теҥыз флотышкат колтат, куд процент утларак национальный гвардийыште да моло войскаште срочный службым эрташ тӱҥалыт. Дипломан рекрут тыглай салтак семын латкок тылзылан стройыш шогалаш але кок ийлан контрактник лияш – шке ойырен налеш. Контракт почеш идалыкыште, мутлан, ӱмаште, 600 еҥ служитлаш каен.

Палемдыме верыш колтымо деч ончыч рвезылан тыглай вургемым чиктат. Частьыш миен шумекше, мутлан, ВМФ-ыш – шем тӱсаным, ВКС ден ВДВ-ш – кандым, моло тӱрлӧ войскашке – шемалге-ужар (защитный) тӱсаным.

Е.Эшкинина.

Опубликовать в Одноклассники

Добавить комментарий