16 майыште Саратов областьыште «Туриада-2018» спортивно-туристический лагерьым почыныт. Тений тудо кумшо гана эртаралтеш. Участник-влакым Россий президентын Юл кундемысе полномочный представительже М.Бабич саламлен.
Ты мероприятий йӱлаш пурен. Тений тушко 700 наре участник чумырген. Ӱдыр-рвезе-влак молгунамсе семынак спорт культурым да шинчымашым пойдараш, туризм корнышто да вӱдыштӧ таҥасаш тӱҥалыт.
Марий Элын командыже икымше кечынак шке кундемже, тудын культуржо, йӱлаже да поянлыкше дене палдарыме презентацийже дене ойыртемалтын.
Лагерь шкешотан улмыж дене палыме. Тудо туризмын ик эн кӱлешан йӱлажым илышыш шыҥдараш полша.
– Тыге ий гыч ийыш спорт результат кушкеш, у деч у шонымаш илышыш шыҥдаралтеш, тӱшка спорт вияҥеш, икте-весе дене палыме лияш йӧн лектеш. «Туриадылан» ямдылалтме дене Юл кундем федерал округысо спортсмен-шамыч ты видыште ончыко лекташ тӱҥалыныт. Мутлан, спорт туризм дене Российын чемпионатыштыже команде-влак коклаште йолын кайыме дистанцийыште икымше верым Марий Элын сборныйжо налын, вӱд дистанцийыште – Пермь край, – манын палемден полпред М.Бабич.
«Туриадыште» ӱдыр-рвезе-влаклан разрядым але спорт мастерыш кандидат нормативым шукташ йӧн пуалтеш.
«Туриада-2018» лагерьын сеҥышыже ден призёржо-влак спорт туризм дене эртаралтше всероссийский таҥасымашлаште вийым тергаш тӱҥалыт.
Е.Эшкинина.
