29 мартыште Республикысе курчак театрыште «Пеледше тукым» республик кӱкшытан конкурс эртен. Ты гана йочасадыш коштшо икшыве-шамыч мурымаште, куштымаште мастарлыкыштым ончыктеныт. Ятыр номерже ава, еш дене кылдалтын, молан манаш гын тиде гана конкурс Еш идалыклан пӧлеклалтын.
Жюри кажне коллективын, посна мурызын мастарлыкыштым аклен. Иктат пӧлек да Тауштымашан серыш деч посна кодын огыл. «Соло» номинацийыште Медведево район Пурсанурысо «Улыбка» йочасад гыч Дина Алмаматова сеҥышыш лектын. Кокымшо верым Советский посёлкысо «Теремок» йочасад гыч Вера Богатырева ден Йошкар-Оласе «Крепыш» йочасадыш коштшо Александра Смирнова налыныт. Кумшо вер Шернур посёлкысо «Ромашка» йочасадын вопитанникше Дарина Антипиналан логалын.
Ӱдыр-рвезе-влак моткоч чаплын выступатленыт. Куштымыштым ончен, мурымыштым колыштын, нунын верч кугешныме кумыл шочын. Илен-толын, нине ӱдыр-рвезе-шамыч сай артист лийын кертыт. Залыште шинчыше-шамычат нунын дене пырля муралтен тавалтеныт, совым рӱж кыреныт. Поснак – ансамбль-влакын мурен-куштымышт годым.
Тыге жюри «Ансамбль» номинацийыште икымше верым Марий Турек посёлкысо «Березка» йочасадлан пуэн. Кокымшо верыш Морко посёлкысо 2-шо №-ан йочасадын «Горошинки» ансамбльже, Шернур посёлкысо «Колокольчик» йочасадын «Пеледше тукым» ансамбльже, Медведево посёлкысо «Колокольчик» йочасадын «Ший оҥгыр» ансамбльже лектыныт. Кумшо Звенигово посёлкысо «Звездочка» йочасадын ӱдыржӧ-влак, У Торъял посёлкысо «Солнышко» йочасадын «Буратино» группышкыжо коштшо йоча-шамыч, Советский посёлкысо «Теремок» йочасадын «Ший оҥгыр» ансамбльже лийыныт.
«Куштымаш» номинацийыште сеҥышыш Йошкар-Ола гыч «Незабудка» йочасадын ансамбльже лектын. Нунын мастарын кушталтымышт кажнын кумылжым савырен. Санденак жюрин нунын икымше верым налмышт нерген увертарыме годым уло зал рӱжге куанен кычкырен. Кокымшо верым У Торъял посёлкысо «Солнышко» йочасадын «Буратино» группышкыжо коштшо йоча-шамычлан пуэныт. Кумшо верым Волжский район Шарача села гыч «Ягодка» йочасадын икшывыже-влак налыныт.
Л.ШАБДАРОВА
Р.Николаеван фотожо
Снимкыште: Йошкар-Оласе «Незабудка» йочасадын ансамбльже
