«МАРИЙ ЭЛ» ТАЧЕ АКЦИЙ КОНКУРСЫ

Туныктымо пашаште моткоч кӱлешан

«Марий Эл» ден «Сурт-пече» газет-влаклан возалтше-шамыч коклаште кажне пелийыште лотерейым эртарена. Пӧлекым намиен пуымо але налаш толмышт годым кажныж дене вашлийын мутланаш мыланна веле огыл, нуныланат моткоч куанле, шонем. Тыге ме газетым лукшо да тудым лудшо-влак икте-весым ужын, ойым вашталтен кертына.

Кодшо кечылаште редакцийышкына Морко район Унчо школышто марий йылме ден литературым, ИКН-ым туныктышо Римма Петрова толын ыле. Тудо кофем модын налын.

— «Марий Эл» газет йоча годсекак мемнан суртыш толеш. Ачай-авайын ӱчаш-ӱчаш лудмыштымат сайын шарнем, — чонжым почеш Римма Николаевна. — А кызыт шкеат куанен лудына. Пытартыш жапыште газетым шергалме годым тыге шонаш тӱҥалынам: «самырык-влак мемнан деч ушанрак улыт ала-мо! Кузе туныктен возен моштат».

Р.Петрова туныктымо пашаштат «Марий Элым» кӱлешан полышкалышылан шотла.

– Газетыште савыкталтше кеч-могай сценарийым куанен лудам. Теве, кодшо кечылаште Кугу Отечественный сар нерген ыле. Тудат пеш кӱлешан, — ойла туныктышо. — Газетым лудмеке, пӱтынь республикыште веле огыл, ӧрдыж кундемлаште илыше марий-влак нерген шуко оҥайым, кӱлешан уверым пален налаш лиеш. Сандене молыланат шочмо йылмына дене савыкталтше газет-влакым лудаш кӱлмӧ нерген ойлем.

Римма Николаевна коклан шкежат возгала.

— Унчо кундемысе йӱла дене моло-шамычат пален налышт манын шонем, — рашемдыш лудшо. — Ожно шудым солымо жапыште шовырым кудалтен модмо нерген материалым илалшырак-влак деч ятыр погенам, но изиш тӧрлатен, ешартышым пуртышаш улам. Тидын нергенат газетым лудшо-влаклан оҥай лиеш ыле шонем.

Газетыште мо огеш ситыла чучеш. Тидын шотышто туныктышо тыгерак вашештыш:

— Туныктымо пашаште литератур дене книга чӱдылык шижалтеш. У программе почеш кӱлеш произведенийым муын огыт керт. Газетыште изирак ойлымаш-влак ончыкыжымат савыкталтыт гын, пеш сай лиеш. Мутлан, пытартыш гана Мария Илибаеван «Орина кова» ойлымашыжым, тыгак Юрий Рязанцевын «Ава шӱм» балладыжым чот кычална. Улыт гынат, ик экземпляр дене йоча-шамыч дене пашам ышташ огеш лий. Тыгак «Школ йолгорно» лаштыкыште литератур термин-влак дене палдарен возымо лиеш гын, сай ыле. Тыгайже икшыве-влакланат, ача-ава-шамычланат пайдале лиеш.

А.БАЙКОВА

Авторын фотожо

Опубликовать в Одноклассники

Добавить комментарий