УВЕР ЙОГЫН

Тунемше йолташыжым утарен

Марий Эл гыч изи герой Москвашке, Федераций Советыш, миен. А тылеч ончыч, эрытше кечылаште, Марий Элын Элкӧргӧ паша министерствыштыже индеш ияш Алексей Скворцовым саламленыт. Рвезе йолташыжым электровий перыме деч утарен коден. 
Алеша Звенигово районысо Какшамарий школышто тунемеш. Аваже медшӱжарлан пашам ышта. Ачаже шке жапыштыже полиций участковый лийын. Кызыт – сулен налме канышыште.

Тений 7 июльышто рвезын йолташыже, палыде, чараҥше электровоштырым кучен. Тудым ток перыме деч утараш манын, Алексей пу тоям налын да воштырым йолташыж деч кораҥден. Тылеч вара кугыеҥ-влакым полшаш ӱжын.

Лӱддымылыкым ончыктымыжлан тунемше Россий МЧС-ын Марий Элысе Тӱҥ управленийжын Чап грамыж дене палемдалтын.
Республикын элкӧргӧ паша министрже Виктор Косарев Алексей Скворцовлан Москвашке экстремальный ситуацийлаште лӱддымылыкым ончыктышо йоча ден подростко-влакым саламлыме церемонийыш каяш ӱжмашым кучыктен. Мероприятий Москваште, Федеральный Собранийын Федераций Советыштыже, «Герой йоча-влак» гражданско-патриотический проект дене келшышын, 2 ноябрьыште эртен.

Л.Камалетдинова.

Опубликовать в Одноклассники

Добавить комментарий