Россий Федерал налог службын Юл кундем федерал округышто межрегиональный инспекцийжын начальникше Валентин Рогов Марий Эл вуйлатыше Александр Евстифеевым ФНС-ын Марий Элысе управленийжын у вуйлатышыже Лилия Гатина дене палымым ыштен.
Александр Евстифеев налог орган-влак Марий Элын тӱрлӧ кӱкшытан бюджетшым пойдарыме, налог базым вияҥдыме да кугемдыме, экономический вий-куатшым пеҥгыдемдыме шотышто кучем орган-влак дене пырля тыршен ыштен, пашам умбакыже шуят манын ӱшанымыж нерген каласен. Регион вуйлатыше палемден: тений шке доход базым чумырышашлан кумылаҥдаш полшышо корным ойырен налме.
Вашеш мутыштыжо Лилия Гатина налог орган-влакын пайдалын пашам ыштымышт Марий Элым вияҥдаш да кугыжаныш задаче-влакым шукташ полшаш тӱҥалеш манын.
Мут толмашеш, тылеч ончыч Лилия Гатина 14 ий Набережные Челны оласе налог инспекцийым вуйлатен. Тидын марте 1997-2003 ийлаште Татарстан Республикыште 6-шо номеран межрайонный отделын вуйлатышыже лийын. Налог службыш куснымешкыже общественный питанийыште, вара ужалыме шотышто инспекторлан, бухгалтерлан, тӱҥ экономистлан, предприниматель-влакын праваштым аралыме шотышто комитетыште пашам ыштен.
Россий ФНС-ын Марий Элысе управленийжын ончычсо вуйлатышыже Кирилл Князевым тений 2 февральыште Оренбург областьысе УФНС вуйлатышылан кусареныт. Тиде жапыште Марий Элыште налог службо вуйлатышын сомылжым ончыч ведомство вуйлатышын алмаштышыжлан ыштыше Денис Смехов шуктен.
Л.Камалетдинова.
