Кодшо кугарнян Кужэҥер район администрацийым вуйлатыше С.Михеев тулык ӱдыр Татьяна Ивановалан пачер сравочым торжественно кучыктен.
Россий да Марий Эл кучем-влак полшымо дене Кужэҥер район администраций тулык йоча-влаклан ий еда кок пачерым налеш. Ты гана пиал ача-ава ончымо деч посна кодшо Татьяналан шыргыжалын. Кужэҥер посёлкышто шочшо ӱдырын пӱрымашыжлан кӧранаш нимолан: ачаже уке, аважым ава права деч шӧреныт, сандене икшывылан Памашсола йоча пӧртыштӧ, тулык йоча-влаклан Октябрьский школ-интернатыште илашыже логалын. А пачерым налшашлан черетыште 2009 ий гыч шоген.
Ынде Татьяна муниципальный пого да мланде ресурс шотышто пӧлка дене ыштыме ойпидыш почеш пачер дене вич ий пайдаланен кертеш, а умбакыже шке пала – собственностьыш оформитлаш але уке.
Пачерышкыже Татьяна лишыл жапыште изи ӱдыржӧ дене кусна.
М.ИВАНОВА.
