Допинг ваштареш кучедалше «РУСАДА» россий агентствын рейтингше почеш, допинг ваштареш кучедалме паша дене ончылно кайыше кум регион коклаш Марий Элат пурен.
Таче кечылан Марий Эл – кокымшо верыште. Икымше верым Белгород область ден Коми Республик пайлат.
«РУСАДА» кажне субъектыште онлайн йӧн дене рейтингым иктешла.
Тидын годым куд ойыртем шотыш налалтеш:
– исполнительный кучемын физический культур да спорт сферылан вуйын шогышо органжын сайтыштыже РУСАДА-н темлымыж дене келшышын ышталтше, «Антидопинг» разделын улмыжо;
– календарьный план почеш регионышто эртаралтше таҥасымаш-влакын план-графикышт;
– тылзе еда эртарыме мероприятий-влак нерген отчёт ден фотографий-влакын улмышт;
– допинг ваштареш кучедалмылан вуйын шогышо специалистын улмыжо;
– специалистын квалификацийжым пеҥгыдемден ончыктышо документын улмыжо;
– РУСАДА дене допинг ваштареш кучедалме шотышто ойпидышын улмыжо;
Марий Элын Молодёжный политике, спорт да туризм министерствыжын пресс-службыжо увертара:
– Республикын минспорттуризмже Допинг ваштареш кучедалше «РУСАДА» российысе агентстве дене чолган пашам ышта. Тидлан вуйын шогышо посна специалистым пеҥгыдемденыт. Тиде – врачебно-физкультурный диспансерысе тӱҥ врачын пашажым шуктышо Наталья Овсянникова.
Республик «РУСАДА» РАА дене допинг ваштареш кучедалме шотышто ойпидышым ик эн ончыч ыштен.
Е.Эшкинина.