Шочмын, 13 январьыште, элыштына Россий Печать кечым палемдышна.
Тиде сферыште тыршыше-шамыч кокла гыч сай паша лектышышт дене ойыртемалтше журналист-влак дене ты кечын эн ончычак правительстве пӧртыштӧ Марий Эл вуйлатыше Александр Евстифеев вашлийын да нунылан наградым кучыктен, профессиональный пайремышт дене саламлен.
— Кажне кечын еҥ, событий, пӱсӧ йодыш, шумо кӱкшыт нерген тендан материалда-влак республикыште улшо чын сӱретым почын пуат. Савыктыме СМИ-влак кундемыштына илыше еҥ-шамычлан, кучем орган, озанлык, предприятий вуйлатыше-влаклан кӱлешан лийын кодыт. Тидым киоск мыняр улмо шот дене Марий Элын Россий мучко 14-ше, Юл кундемыште 2-шо верыште улмыжат пеҥгыдемда, — каласен регион вуйлатыше.
«Марий Элын шӧртньӧ пераже» премийым тений Марий Турек районысо «Знамя» газетын тӱҥ редакторжо Лариса Меркушевалан кучыктеныт.
Умбакыже Марий Эл правительствын кодшо ийысе «Марий Эл Республикым социально-экономически вияҥден толмым эн сайын ончыктымылан» журналистике шотышто премийжын тӱрлӧ номинацийыште сеҥышыш лекше-влакым палемденыт. Тиде радамыш мемнан журналистна Светлана Носова, «Марийская правда» газетын собственный корреспондентше Дмитрий Шахтарин, редактор-влак Андрей Антонов ден Марина Оленева, «Марий Эл Телерадио» ГАУК-ын ответственный редакторжо Мария Шавкунова, «Волжская правда» газет редакцийын авторский коллективше логалыныт. Марий Эл вуйлатышын Тауштымашыжым журналистна Раиса Чепакова ден вёрсткым ыштыше Эльвира Казаковалан кучыктеныт. «Кугарня» газетын корреспондентше Татьяна Иванова «Марий Эл культурын сулло пашаеҥже» почетан званий дене палемдалтын.
Кечывал деч вара Россий Печать кечылан пӧлеклалтше торжественный мероприятий Республикысе курчак театрыште лие. Эн ончычак мут Марий Эл правительстве председательын икымше алмаштышыже Михаил Васютинлан пуалте. Тудо погынышо-влакым пайремышт дене саламлыш да «Марий Эл» газетын журналистше Любовь Камалетдиновалан Россий Федерацийын Цифровой вияҥмаш, связь да массовый коммуникаций министерствыжын Чап грамотшым кучыктыш. Умбакыже тӱрлӧ министерстве ден ведомство, учреждений вуйлатыше ден алмаштыше-влак, журналист-шамычын пашаштым кӱкшын аклен, нунылан поро шомак ден тыланымашым ойлен, ойыртемалтшыштлан Чап грамотым, Тауштымашым да пӧлекым кучыктышт. Нунын коклаште мемнан коллектив гычат икмыняр еҥ улыт ыле. Эльвира Казакова Марий Эл Кугыжаныш Погынын Тауштымашыж дене палемдалте. Журналист Юрий Исаков «МедиаТЭК – 2019» Всероссийский конкурсын региональный этапыштыже I верым налын да диплом дене, тыгак Россий журналист ушемын грамотшо дене наградитлалте. Журналист Маргарита Ивановалан Марий Элын Социальный вияҥмаш министерствыжын Чап грамотшым кучыктышт. Фотокорреспондент Михаил Скобелев Тӱвыра, савыктыш да калык-влак паша шотышто министерствын спецпризше дене палемдалте. Журналист Елена Эшкининалан да «Марий Эл» газетнан коллектившылан Республикысе Молодежный политике, спорт да туризм министерстве Тауштыман серышым кучыктыш. Инвалид-влакын III Всероссийский кеҥежымсе спартакиадыштым кумдан ончыктымылан журналист Алевтина Байкова ден «Марий Эл» газет коллективлан Марий Эл правительствын Тауштыман серышыжым пуышт. М.Шкетан лӱмеш Марий кугыжаныш драме театр коллективланна 100 ияш лӱмгече ийыште театрын усталык пашажым кумдан да тӱрлӧ шӧрын гыч ончыктен шогымылан Таумутым кучыктыш. Икманаш, кодшо ийын редакций моткочак тыршен пашам ыштен да чынже денак кугу кӱкшытыш шуын. Арам огыл чылаже 9 пашаеҥна палемдалтын!
Но ме, «ынде наградым налынна, тугеже йолым рӱзалтенат шинчен кертына» шонен, канаш огына ярсе. Пайрем гӱжлен эртыш да мемнам, журналист-шамычым, уэш тӱрлӧ верла ден кундемлашке кужу ма кӱчык корно вуча. Уэш ме кажне кечын тендам, пагалыме лудшына-влак, тӱняште, элыште, республикыштына, ты я вес кундемыште мо ышталтме дене палдараш, у деч у уверым намиен шукташ вашкена. Да возымына келшыже, чонышкыдак логалже, уш-акылдам, тӱняумылымашдам мыняр-гынат пойдараш, илышдам кеч иктаж-мо шотышто пиаланракым ышташ полшыжо манын, изин-кугун тыршена!
Любовь КАМАЛЕТДИНОВА
М.Скобелевын фотожо
