Теҥгече Марий Элын шымше созыв Кугыжаныш Погынжын визымше бюджетный сессийже эртыш.
Тушто Марий Эл вуйлатыше А.Евстифеев, РФ Федеральный Собранийын Федераций Советшын еҥже-влак С.Мартынов ден К.Косачев, республикысе правительствын еҥже, министерстве ден ведомство-шамычым вуйлатыше-влак лийыныт.
Ончышаш 16 йодыш кокла гыч 2020 ийлан да 2021 ден 2022 ийласе плановый жаплан республиканский бюждет закон ик эн тӱҥлан шотлалтын.
2020 ийлан бюджетный кредит-влакым реструктуризоватлыме шотышто РФ-ын Финанс министерствыж дене ыштыме соглашений-влакын условийыштым шуктышашлан депутат-влак дефицитдыме республиканский бюджетым, тыгак 2021 ийлан 49,3 млн. теҥге да 2020 ийлан 443,5 млн теҥге профицит дене бюджетым пеҥгыдемдышт. 2020 ийлан пурышо пӧртылтыдымӧ оксам 17, 4 млрд. теҥге кугыт дене палемдыме. Ялозанлыклан полшаш 1,2 млрд теҥгем ойыраш лийме. Тидыже 2019 ий дене таҥастарымаште 2,78 гана шукырак.
Марий Эл вуйлатыше А.Евстифеев депутат-шамычым кум ийлан бюджетым пеҥгыдемдыме дене саламлыш да республикым вияҥдышаш верч ончыкыжымат пырля пашам ышташ тӱҥалына манын каласыш.
Тыгак депутат-влак шушаш кум ийлан Марий Эл Республикым социально-экономически вияҥдыме прогнозым, 2020 ийлан да 2021 ден 2022 ийласе плановый жаплан обязательный медицине страхованийын территориальный фондшын бюджетше нерген закон-влакым луктыч. Стратегический планирований, ялысе образовательный учреждений пашаеҥ-влаклан социальный полышым пуымо, тулык йоча-влаклан илыме верым ситарыме, алкоголизм да наркоманий шотышто профилактике, Марий Элын кугыжаныш гражданский служащийже-влаклан классный чин-влакым пуымо йодышла дене республиканский закон-влакым федеральный законодательстве дене келыштарышт.
Повестке дене келшышын, депутат-влак, шолып йӱклен, Марий Элыште Айдемын праваж шотышто у уполномоченныйым Фанис Харисович Мухаметгалиевым да Марий Элын Адвокат палатыж пеленысе квалификационный комиссийын составышкыже Марий Эл Кугыжаныш Погын деч кок представительым, Л.Виноградова ден Г.Мякишевым, сайлышт.
Парламент Рӱдӧ сайлымаш комиссийын председательже И.Татаринован Марий Элын шымше созыв Кугыжаныш Погынжын депутатше-влакым сайлымашлан ямдылалташ да тудым эртараш Марий Элын бюджетше гыч ойырымо средствам кучылтмо нерген отчётшым пеҥгыдемдыш.
Черетан сессий 26 декабрьыште лийшаш.
Р.ЧЕПАКОВА
