УВЕР ЙОГЫН

«Теҥгече мондалтше – таче уэш «йоҥгалтын», –

– манын Марий Эл вуйлатыше А.Евстифеев Европа да тӱнямбал кӱкшытыштӧ сеҥыше, призёр радамыш логалше спортсмен-влакым саламлышыжла.

Вашлиймаште участник-шамыч профессионал спортсмен-влакым куштымо, тӱшка спортым вияҥдыме нерген ойленыт.  

– Шукерте огыл Федераций Советыште республикын кечыже-влак эртыме жапыште Валентина Ивановна Матвиенко Россий кумдыкышто Марий Эл изиш мондалтын ыле гын, теве ынде уэш тудо йоҥгалташ тӱҥалын манын. Тидыже тендан результатда, спорт кӱкшытда, сеҥымашда денат кылдалтын. Те республикым, Российым тӱрлӧ кӱкшытан спорт мероприятийлаште  чапландареда. Тау тыланда. Те  физически да психологий велымат пеҥгыде улмыдам ончыктеда. Такшым сеҥымаш эн ончыч вуйышто лийшаш. Кеч-могай спорт сеҥымаш – командын пашаже. Тыгак тренер-преподаватель, специалист, ача-ава-влакым мокталтыман. Российын президентше Владимир Путинат спорт, таза илыш-йӱла верч вуйын шога. Спорт таза да сай  илышым пуа, шкем личность да профессионал семынат вияҥдаш полша. Марий Элыште спортым вияҥдашлан кугу тӱткыш ойыралтеш. Кап-кыл дене начарын шуаралтше-шамычланат спорт дене кылым кучаш йӧн ышталтеш. Чылаже 73 федераций пашам ышта. Ончыкшымат тыгай кумыл денак сеҥымашке шуза, кӱшнӧ лийза, – лие Марий Эл вуйлатышын саламлыме мутшо.    

Саламлымаш Правительстве пӧртыштӧ эртен. Европа да тӱнямбал кӱкшытыштӧ сеҥыше, призёр радамыш логалше спортсмен-влак коклаште ӱштӧ дене таҥасымаште тӱнямбал чемпионатын кок гана чемпионжо М.Галлямов (Татарстан да Кыргыз республиклаште), фитнес-аэробике дене «Экстрим» (Европын первенствыж ден чемпионатше, ший призёр Чехий) ден «Аквамарин» (тӱнямбал первенстве ден чемпионат, бронзо призёр) команде-влак, панкратион дене А.Богданова (Европын чемпионатше, Сербий, 1-ше вер), ты чемпионатштак ты вид денак М.Сабанцева (3-шо вер) ден Ё.Дедаханов (2 шєртньє медаль), дзюдо дене Н.Голомидова (бронзо призёр), квадроцикл спортышто тӱнямбал кубокын озаже А.Максимов лийыныт. Эн самырык спортсмен-шахматист М.Волков (тӱнямбал первенстве, бронзо призёр) ден гребля дене А.Коровин (Европын первенствыже, ший призёр, тӱнямбал первенствын ший призёржо) тӱрлӧ амаллан кӧра толын кертын огытыл.

Тушто тыгак Марий Элын самырык-влакын политикышт, спорт да туризм министрже Л.Батюкова лийын. Тудо спортсмен-влакын лектышышт, ончыкшым могай у спорт объектым чоҥышаш дене палдарен.

Вашлиймаште кажне спортсменлан У ий пєлекым кучыктеныт.

Тений марий спортсмен-влак межрегиональный, Россий, тӱнямбал кӱкшытан таҥасымашлаште сай результатым ончыктеныт. Чылаже 278 медальым (96 шӧртньӧ, 98 ший, 84 бронзо) сеҥен налыныт. Тылеч посна тӱнямбал кӱкшытыштӧ куд шӧртньӧ, кум ший да кум бронзо медальын озаже лийыныт. Таче кечылан 69 ӱдыр-рвезе спортын 14 видыштыже Российын сборный командыштыже шотлалтеш.

Тений Марий Эл вуйлатыше А.Евстифеев икымше гана коммерческий огыл организаций-влаклан республике правительствын грантшым, 2 миллион теҥгем, ойырен.

Вес ий гыч республикыште тӱҥ семын спортын куд видше шотлалташ тӱҥалеш: куштылго атлетике, иймаш, спорт гимнастике, регби, ече, сокыр-влакын спортышт.

– Кок ий республике верысе спортлан шотлалтше вид-влакым вияҥдаш  федеральный субсидийым налын огыл. Марий Эл правительстве тений тидым ыштен кертын. Тыге 2019 ий гыч куд видым вияҥдашлан 6 миллион теҥге ойыралтеш. Регионышто илыше еҥ-влак кокла гыч 40 процентше физкультур да спорт дене пеҥгыде кылым куча. Вес ийын Козьмодемьянскыште 3 миллион теҥгеш хоккей коробкым чоҥат. Витле миллион теҥгеш кок муниципал стадионым уэмдыме. 2024 ий марте федерал да верысе бюджет полшымо дене чыла муниципал районышто ГТО-м сдатлаш площадке-влак лийыт, – манын палемден Л.Батюкова.

  

Е.Эшкинина.

Опубликовать в Одноклассники

Добавить комментарий