Татарстан Республик Мензелинск районысо Чопай селаште Агарман кумалтыш эртен.
Тудо шыже пасу паша тургымым сайын эртарен колтышашлан пӧлеклалтын.
Ты кундемысе марий-влакын акрет йӱлаштым ылыжтен, вияҥден толмо верч поснак верысе карт-влак тыршат. Нуно кумытын улыт: Актаныш район гыч Валерий, Муслюм район гыч Николай да Мензелинск район гыч Юрий. Нуно ял пайрем годымат, самырык-влакын модмаштыштат, айдемым пытартыш корныш ужатыме годымат шке шинчымашышт дене пайлалтыт, самырык-влакым йӱлам шотлаш туныктат, кузе ыштышашым виктарен шогат. Марий кӱсотылаште кумалме йӱлам шуктат.
Сентябрьыште нуно Руш Мушуга ял воктенысе курыкышто кумалтышым эртараш палемденыт. Кеч тушо верланыше марий-влакын шотлымо ший памашын лӱмжат вашталтын, татар калыкыным налын, ынде Шифа су маналтеш. Тушто ынде мечеть, черке нӧлталтыт. Но ты кундемысе марий-влак историйым шарнат. Памашын шнуй виян улмыжым, еҥ-влакым тӱрлӧ чер деч эмлен кертмыжым паленак тиде верыш вуйым саваш, вӱдым налаш шонен толшо-влак эре улыт. Вет тушко эше 1914 ийыштак икымше тӱнямбал сарыш кайыше самырык рвезе-влак кумалаш коштыныт. Кеч шукышт шочмо верыш мӧҥгеш пӧртылын огытыл. Лач нуным шарныме шот дене марий карт-влак тушто угыч кумалтышым эртараш шонат. Шонымыштым илышыш шыҥдарен кертыт мо? Верысе кучем тидлан кӧна мо? Кызытеш раш огыл гынат, ӱшан уло. Тидын нерген социальный сетьысе Марий Суксы ялын илышыж дене палдарыше группышто, марий мер илышыште чолгалыкым ончыктышо ӱдырамаш Елена Ирдуганова шонкала.
С.Носова.
