Фотовыставке
«Сеҥымаш тул» чоным ылыжта
Сеҥымаш пайрем вашеш «Мариэнерго» Йошкар-Олаште илыше-влаклан Ната Бабушкина лӱмеш скверыште «Сеҥымаш тул» фотовыставкым почын.
Филиалысе энергетик-влак тений ты скверым ончыч куштыра деч эрыктеныт, теҥгыллам, бордюр ден пушеҥге тӱҥлам чиялтеныт, калыкын йӧратыме каныме верым тӱзатеныт. Вара шӱдыр семын келыштарыме тул волгалтарышым шынденыт.
Ынде тиде волгалтарыш воктене скверыште шарныктыш фотовыставкым вераҥденыт. Тудо Кугу Отечественный сар ийлаште фашизмым сеҥаш полшышо энергетик да тылыште ыштыше-влакын чулымын тыршымышт нерген каласкала. Калыкнан геройлыкшо нерген шарнымашым арален кодаш да самырык тукымым эл йӧратыме шӱлышеш шуарен кушташ – теве могай шонымаш дене тудым эртараш келшыме.
«Кугу Отечественный сар ийлаште кугезына-влакын подвигышт – тиде шарныктыш веле огыл, тиде нӧлтшӧ кумыл, икоян улмо да шке элым йӧратымаш. Кӧ фронтышто шке илышыжым пуэн, тылыште сеҥымашым тапташ полшен, ме нуным чапландарышаш улына. Ӱшанем, Йошкар-Олаште илыше да уна-влак, тиде фотовыставкым ончен лектын, шке чон шижмашыштым пойдарат, кугешнымаш кумылыштым ылыжтат», – каласен «Мариэнергон» директоржо Сергей Хлусов.
Юрий ИСАКОВ.
Снимкыште: скверыште – фотовыставке.
Фотом «Мариэнергон» пресс-службыж деч налме.
