Тӱнямбал кеҥеж Универсиадыште Марий Эл гыч Н.Голомидова команде дене бронзо медальым сеҥен налын.
Студент модмаш 19-30 августышто Тайваньыште лийын. Тушто Российын командыже (347 еҥ) 20 видыште, куштылго атлетике да бильярд деч посна, вийжым терген, 4-ше верыш лектын. Икымшыште – Японий.
Волжский район гыч 22 ияш Наталья дзюдо дене 57 килограмм нелытан-шамыч коклаште татамиш лектын. Тудо личный зачётышто, тыгак командылан таҥасен. Икымшыштыже кумшо вер «кидйымач» мучыштен, японкылан сеҥалтын гын, командылан призёрыш логалшаш очком конден.
Палемдыман, тачысе кечылан Н.Голомидова Москва областьын чапшым арала. Марий Эл гыч икмыняр ий ончыч Чувашийыш каен. Ончыч Волжск олаште тренироватлалтын. Шкеже Памар села гыч, тале спортсменке семын аклалтын.
Наталья 2016 ийыште самырык-влак коклаште Европын первенствыштыже, тений Тбилисиште «Гран-при» турнирыште да Европын кубокыштыжо призёр лийын.
Е.Эшкинина.
