Жапым чылаланат ситарат
Регионнан икмыняр районыштыжо футбол дене чемпионат кая. Таче лудшына-влакым Волжский район, Корамас кундемын командыж дене палдарена.
Футболист-шамычын черетан матчышт годым мыят, чытен шым керт, модмыштым лӱмынак ончаш мийышым. Ты кечын Карай ден «Спутник» (Корамас) команде-влак вашлийыныт. Стадион йыр ончышо-шамычат ятырынак койыт. Изиракшат, самырык ешат, йочаштым коляске дене шӱкен коштшат, илалше-влакат чумыргеныт. Кугу Корамас стадион мучко футболист-шамычын мече почеш куржталмыштым тӱткынат эскерат, кунамже куанен, кунамже йоҥылыш лиймышт годым, кумыл волен, шыдешкен кычкырал колтат. Коеш: иза-шольышт, палымышт, йолташышт, команде верч тургыжланат.
Теве Максим Уткин Карай кундем командын капкашкыже моткоч мотор голым пуртыш. Тидыжым ончаш толшо-влакат палемдышт. Соперник-шамычат огыт мале: ямдылалтыныт. Тыге ты вашлиймаш ничья дене: 2:2 счёт дене мучашлалте. Ты кече марте «Спутник» ончылно каен, но спорт тиде спорт. Сандене тӱрлыжланат ямде лийман.
— Тӱрлӧ амаллан кӧра кок матчым коденна. Кызытеш ынде нылмыше верыште улына, — рашемдаш полша командын 11-ше номеран модшыжо М.Уткин. – Ик голым мый пуртенам гын, вес мечыжым соперникын капкашкыже Даниил Семёнов чумалын. Мутат уке, ончык лекме шуэш. Кажне командыже тидымак шонен пасушко модаш лектеш. Тений районышто лу команде чемпионатыш ушнен. Эн талыжлан Пӧтьял кундем гыч футболист-шамыч шотлалтыт. Мыланем футбол дене модмаште, рушла ойлымо шуэш, эмоций келша. Такшым командыштына икте-весым умылаш тыршена, шке гыч тренировкым эртарена.
Максим Уткин шкеже Чодыраял гыч, Пӧтъял кыдалаш школышто тунемын. Ече, куштылго атлетике дене пеҥгыде кылым кучен, ойыртемалтын. Пошкудо Татарстаныште эртыше таҥасымашлаште вийжым терген, призёр радамышкат логалын. Кызыт Йошкар-Олаште тунемеш, мини-футбол дене модеш.
— «Спутник» командыштына модшо-влак шотышто нелылык уке. Вашталташат кумылан-шамычат иктаж шымытын улыт. Тидыжым гына матч годым вич гана веле ышташ лиеш. Мый шкеже нападающий улам. Футбол дене модаш моткоч келша. А эн сай нападающий семын Максим Уткиным палемдыман. Защитник Игорь Поповат тале футболист. Тыгак Данил Семёнов, Костя Александров сайын модыт, — мутланымашке 6-шо №-ан участник Роман Петров ушныш. – Соперникын капкашкыже голым пуртымо годым модаш кумыл эшеат чот лектеш, куан кумыл авалта. Тыгай годым эшеат писын куржталына. Ончаш толшо-шамычынат кычкырымышт кумылым луктеш. Шукырак толыт – оҥайрак. Икте кумылым волта: мемнан тренерна уке. Ме кажныже шке гыч, шке технике дене кузе моштена, туге модына. Мутат уке, южгунамже умылыдымашат лиеда, но икте-весылан полшаш, команде шӱлышым кучаш тыршена.
Роман Петров Пезмучаш ял гыч. Тудат спорт дене пеҥгыде кылым куча. Телым ече дене куржталеш, а кеҥежым — куштылго атлетике. Эшежым хоккей дене модеш. Телым районышто икмыняр команде хоккей турнирыште вийжым терга. Тудат тушко ушна. А эккипировкым кеч футболлан, кеч хоккейлан, команде дене чумырген налыт. Сеткыланат шийвундым погат. Тидланже кеҥежым, йӧн лекме семын пашам ыштымышт сай шӱкалтышым ышта, вет рвезе-влак пасушко ковышта сомлашат, шӱкшудо кӱрашат коштыт. Тыге шканышт спорт инвентарьым, буцым налыт.
Теве вес модшо 31-ше №-ан защитник – Игорь Попов.
— Мыланемат футбол дене модаш, куржталаш, соперник ваштареш таҥасаш пеш келша. Тренерна уке гынат, кутырен келшен, погынен, ямдылалтына, — манеш Игорь. — Мый защитник улам, сандене пӧртышкӧ кузе йот еҥым огыт пурто, капкам туге аралыман, шонем. А командыште кажне модшо ӱшанле. Капитанна – Егор Кузнецов, а эн тале модшо семын Даниил Семёнов шотлалтеш.
Такшым футболист-шамыч коклаште пашам ыштышыжат тунемшыжат, ешанжат улыт. Сандене рвезе-влак жапым чылаланат ситараш тыршат. Сеҥыше команде республик кӱкшытыштӧ районын чапшым аралаш тӱҥалеш.
Республик кӱкшытыштӧ футбол дене талын модшо сборный семын Шернур район гыч «Сокол» командымат палемдыме шуэш. Ты кундемыште чемпионатыште кандаш команде вийжым терга. Кызытеш эн ончылно «Союз-Кукнур» команде кая. А Кужэҥер районышто футбол дене чемпионатыш куд сборный ушнен. Таче кечылан эн ончылно – Тумньымучаш гыч «Россия» команде ойыртемалтеш. Медведево районышто пеш чолга команде-влак улыт. Чаманен каласыман, тӱрлӧ амаллан кӧра ончыч чолган модшо Параньга, У Торъял, Советский кундемлаште футбол дене район кӱкшытан чемпионатыш ушнышо лийын огытыл.
Кеч-могай сборный командын шке роскотшо уло. Кажне гана вес команде дене модаш лекме годым кеч-могай кундемыште тидын дене тӱкнат. А кумылан-влак йӧным муыт: я шке автомашина дене погынен кудалыт, я автобусым ойырат, шийвундымат мо кӱлешлан шкеак кутырен келшен погат.
Мутат уке, тыгодым пеҥгыдылык, чытыш деч посна нигузе. Тау чылаштлан, сай модмашым ончыктымыштлан, южгунамже илышыш шкешотан ойыртемым пуртымыштлан. Чылаштлан пеҥгыде тазалыкым, икоян командым, умылымашым тыланена.
Е.Эшкинина.
