12 августышто Марий Элыште Физкультурникын кечыже лӱмеш шуко оҥай спорт мероприятий эртен. Чыла муниципальный районлаште, манаш лиеш, ты кечын физкультур ден спортын таҥже-влак стадион ден площадкылашке лектыныт, тӱрлӧ таҥасымаште вийым тергеныт.
Тӱҥ мероприятий Йошкар-Оласе «Дружба» стадионышто лийын. Тушто спортын 7 видше дене таҥасымаш эртаралтын. Куштылго атлет-шамыч куржталмаште да кӱкшытым налмаште тыршеныт, шахматист-влак уш-акылыштым пудыратылыныт, баскетболла модмаште тунемше-влак сай результатым ончыктеныт… Бассейн-влакат яра шинчен огытыл.
Но эн оҥайже футбол дене Марий Элын кубокшо лийын. Финалыште «Тарханово» (Йошкар-Ола) ден «Сокол» (Шернур) команде-влак вашлийыныт. Шернур футболист-влак верч тургыжланаш, нунын кумылыштым нӧлталаш лӱмынак кум автобус да посна автомашина дене болельщик-шамыч толыныт, но… Икымше таймыштак раш лийын: тархановец-влак ончыко лектыт (соперникын капкашкыже кум мечым пуртеныт). Кокытым – кокымшо таймыште. Матч 5:1 счёт дене мучашлалтын. «Соколын» модшыжо-шамыч ешартыш минутышто голым пуртеныт. Нуно ты команде верч тургыжланыше, тудлан полшышо-влаклан кугу таум каласат. «Кубокын озаже лияш эше жап шуын огыл», – маныт, да ончыкылык сеҥымашлан ӱшаным огыт йомдаре.
Команде-шамыч коклаште эн сай модшым палемденыт: «Тарханово» сборный гыч Андрей Кириллов, «Сокол» команде гыч – Андрей Мухачёв. Посна пӧлекым Денис Мамаевлан («Сокол» командын болельщикше) кучыктеныт. Тудо Марий Эл футбол федерацийын эн сай гербшылан увертарыме конкурсышто сеҥышыш лектын.
Е.Эшкинина.
Снимкылаште:
Д.Речкинын фотожо.