Марий Элын Тазалыкым аралыме министерствыжын увертарымыж почеш, теҥгече, 20 апрельыште, республикнан стационарлаж гыч у коронавирус инфекций шотышто эмлалтме курсым эртыше эше куд еҥым мӧҥгышкышт колтеныт. Тыге, шучко черым сеҥыше-влакын чотышт таче кечылан, 21 апрельлан, 52 еҥ марте шуын. Тыгодымак регионысо больницылаште коронавирус дене черланымым пеҥгыдемдыме диагнозан да инфекций дене авалталтын кертыныт манын шонымо 216 пациент эмлалтеш. Нунын кокла гыч 36 черле неле состоянийыште, 189 еҥын тазалыкшым «нелылыкын кокла йыжыҥже» семын аклат, визытыным – «нелылыкын куштылго йыжыҥже» семын. Кок пациент шодым искусственно вентилироватлыме йӧн дене шӱла. 92 черлылан кислород кӱлеш.
21 апрель эрдене Йошкар-Оласе больницын инфекционный отделенийыштыже 155 еҥ эмлалтын. Врач-влак визыт деч моло пациентлан «пневмоний» диагнозым шынденыт. 34 черле неле состоянийыште, 121 еҥын тазалыкше «нелылыкын кокла йыжыҥже» семын аклалтеш. Ик черле шодым искусственно вентилироватлыме йӧн дене шӱла. 82 пациентлан кислород кӱлеш.
Йоча республиканский клинический больницыште куд икшыве кия. Кок пациентлан «пневмоний» диагнозым шындыме. Коктын «нелылыкын кокла йыжыҥже» манме состоянийыште улыт, ныл йочан тазалыкше «нелылыкын куштылго йыжыҥже» семын аклалтеш.
Звенигово районысо рӱдӧ больницыште у коронавирус инфекций дене авалталтын кертыныт манын шонымо 8 еҥ кия. Врач-влак нунын тазалыкыштым «нелылыкын кокла йыжыҥже» семын аклат, ик пациентлан «пневмоний» диагнозым шынденыт.
Козьмодемьянск межрайонный больницын инфекционный отделенийыштыже коронавирус дене авалталтын кертыныт манын шонымо 10 пациент эмлалтеш. Ик черле неле состоянийыште, кандаш пациентын тазалыкшым «нелылыкын кокла йыжыҥже» семын аклат, иктыным – «нелылыкын куштылго йыжыҥже» семын. Индеш еҥым пневмоний деч эмлат.
Волжск оласе рӱдӧ больницын инфекционный отделенийыштыже коронавирус дене черланен кертыныт манын шонымо шым пациент кия. Нунын состоянийышт «нелылыкын кокла йыжыҥже» семын аклалтеш. Куд еҥ пневмоний дене черланен. Кок пациентлан кислород кӱлеш.
Марий Турек районысо рӱдӧ больницын инфекционный отделенийыштыже 20 еҥ эмлалтеш. Икте деч моло черлын состоянийжым врач-влак «нелылыкын кокла йыжыҥже» семын аклат, лучко пациентлан «пневмоний» диагнозым шынденыт. Куд еҥлан кислород кӱлеш. Неле состоянийыште улшо ик пациент шодым искусственно вентилироватлыме йӧн дене шӱла.
Медведево районысо рӱдӧ больницын коронавирусан пациент-влаклан хирургический да акушерско-гинекологический профилян медицине полышым пуымо отделенийыштыже 10 пациент кия. Куд еҥым пневмоний деч эмлат. Врач-влак чыла черлын тазалыкшым «нелылыкын кокла йыжыҥже» семын аклат. Кок пациентлан кислород кӱлеш.
М.ИВАНОВА
