Самырык мурызо Ший Алисан мурыжо-влак Марий Эл радиошто чӱчкыдынак йоҥгат. Пытартыш жапыште тудо хит-парадыштат кӱшыл «тошкалтышыште» верым айлен.
Ший Алиса – Алиса Халтурина. Тудо Марий Турек районысо Марий Шолэҥер ялыште шочын-кушкын. Кызыт ӱдыр районысо тӱвыра да каныме «Заря» рӱдерыште хормейстерлан, тыгак культорганизаторлан пашам ышта, калык коллектив лӱмым нумалше «Русь» хорым вуйлата.
Ӱдыр изинекак мураш кумылан лийын мо? Сценылан тыгай лӱмым налаш кӧ темлен? Тудын репертуарже кугу мо? Нине да моло йодышлан шкеж дене мутланымеке пален нална.
— Алиса, изиэт годсек, очини, мураш йӧратет?
— Мурылан, музыклан йоча пагытыштак шӱмаҥынам. Тӱҥалтыш класслаште тунемме годым школ пеленысе «Изи шӱшпык» ансамбльыш (вуйлатышыже – Римма Шутова) коштынам. А Марий Турек кыдалаш школышто тунемме годым верысе сымыктыш школыш коштынам, домр дене шоктенам, хорышто муренам.
— Тидыжак тугеже Палантай лӱмеш тӱвыра да сымыктыш колледжыш каяш таратен?
— Чын, 2010 ийыште колледжысе хор пӧлкан тунемшыже лийынам. Кокымшо курсышто колледж пеленысе «Эрэҥер» ансамбльыш ушненам. 2015 ийыште коллективым Эшпай лӱмеш Марий кугыжаныш филармонийыш кусарышт. «Эрэҥер» деч посна «Марий кундем» оркестр пеленат муренам. Ик жап Россий калык усталыкын сулло коллективше «Марий памаш» ансамбльыштат муренам, куштенам. Нине коллектив-влак дене Москоштат, Ростов областьыштат, Эстонийыштат лияш пиал логалын. Поснак 2014 ийыште Москошто, Гнесинмыт лӱмеш Россий музык академийыште, «Изи корнет» мурым марла йоҥгалтарымем тачат сайын шарнем.
— Икымше гана эстраде мурызо семын кугу сценыш кунам лектынат?
— 2015 ийыште «Шӱмсем пӧлек» передачын лӱмгечыжлан пӧлеклалтше пайрем концертыште «Изи корнет» калык мурым муренам. Калык шокшын вашлийын, сандене умбакыжат сценыш лекташ кумыл лийын. Тиддеч вара «Ший памаш» эстраде муро конкурсыш Ольга Шаравуеван «А мый ом пале» мурыж дене ушненам ыле. Варажым тиде муро Марий Эл радиоштат йоҥгалташ тӱҥалын. Конкурсышто сеҥыше радамыш лектын омыл гынат, эшеат чолганрак пашам ышташ таратен.
— Кызыт репертуарет кугу?
— «Колто мыйым», «Шонем-шонем», «У ий», «Тыйын таче шочмо кече», «Йӧратем», «Аваем», «Тымык ӱжарам кодымо шуэш» да молат. Чылаже лу утла мурем уло. Теве теҥгече гына кокытшо ямде лийын, интернетыште колышташ лиеш.
— Клипымат войзенат?
— Тӱняште кажне айдемын эн лишыл да шерге еҥже-влак — ава ден ача — улыт. Репертуарыштем «Аваем» муро уло. Тудым йоҥгалтарыме годым эреак шочмо ялем, аваем нерген шоналтем, сандене клипым войзашак шоненам. Шонымашкем шуаш «Марий Эл» ГТРК полшен. Клипым Йошкар-Олаште да шочмо ялыштем сниматленна.
— Мурылан кӧн сылнымутшым ойырен налат?
— Надежда Эмыканын, Алевтина Баязитован, Ольга Шаравуеван, Анастасия Айгузинан, Наталья Никифорован, Александр Мамаевын почеламутышт почеш муро-влак шочыныт.
— Сценылан молан Ший Алиса лӱмым ойырен налынат?
— Колледжыште кугыжаныш экзаменлан «Изи корнет» калык мурым ямдыленам ыле. Тудо туныктышем Ольга Николаевна Даниловалан пеш келшен да мурылан «плюсовкым» возаш темлен. Ойлымыжым шуктенам. Ольга Николаевна ты кастенак мурым электрон почтышкем Ший Алиса лӱм дене колтен. Ойыртемалтше, оҥай лӱм, шоналтенам да варажым Марий Эл радион эртарыме «Эр чолпан» конкурсышкыжат у мурем тиде лӱм дене колтенам. Тушто «усталык шӱлыш» номинацийыште палемдалтынам. Тиддеч вара ынде сценыш Ший Алиса лӱм дене лектам.
Алевтина Байкова мутланен.
(Фотом еш альбомжо гыч налме.)
