Кӱсле, гармонь, балалайке, домр… Тӱняште могай гына семӱзгар уке гын!? Кажныже ышталтмыж дене веле огыл, семже денат икте-весыж деч ойыртемалтеш.
Йолташ-влак, тыланда могай семӱзгар утларак келша? Молан лачшымак тудым ойырен каласеда?
Юрий ИСАКОВ, Российын да Марий Элын сулло журналистше:
– Кӱсле кажне марий еҥлан эн чот келша докан, мыламат. Тудо шкежат, йӱкшат ойыртемалтше – чылт марий гаяк, чылт марий семӱзгар. Тудым колышт, нигунам от нойо, кумылет гына нӧлталтеш. Тыгак мый гармоньым йӧратем. Егор кочам Морко район Кӱчыкэҥер ялыште эн тале гармонист лийын, манеш ыле «От Москвы до Эльбы» шарнымаш книган авторжо гвардий полковник Павел Курсов: «Пошкудо Кожлаер ялыш миена, Егор гармонь дене шокталтен колта – чыла ӱдыр-влак мемнан йыр чумыргат ыле». Ачамат, Валентин Егорович, гармонь дене шокташ йӧратен. Мый гына шоктен ом мошто, но мураш йӧратем да еҥ шоктымым куанен ончем, колыштам.
Лариса ПЕТРОВА, Марий Элын сулло журналистше:
– Кажныже шкешотан йӱкшӧ дене кумылым савыра. Туге гынат кӱсле дене шоктымым поснак йӧратем. Ныжыл семже йоҥгалтешат, шинча ончылно ош йӱксӧ сӱретлалтеш, сад лоҥгаште, ломберлаште шӱшкалтыше шӱшпык шарналтеш. Чаманаш логалеш, кӱсле дене шоктымым шагал колына. Но гармоньымат йӧратем. Вет тудын деч посна пайремжат йокрок лиеш. Тек кажне семӱзгарын шке озаже лиеш да мемнам ныжыл семышт дене куандарат.
Сергей СВЕЧНИКОВ, марий шымлызе, историй шанче кандидат:
– Кӱсле эн чот келша. Тудын йӱкшӧ яндар, йоҥгыдо, ныжыл. Кӱслем ковам шокташ йӧратен, садлан тудын семже изи годсек мыланем лишыл.
Александр КОЖЕВНИКОВ, Марий самырык театрын артистше:
– Фортепианом театрыште йоҥгалтше семӱзгарлан шотлем. А мыланна, марий-влаклан, гармонь эн лишыл. Тудын весела семже почеш кушталтыде нигузе от чыте!
Родион ЕГОРОВ, «Блокбастер» группын солистше:
– Кеч-могай семӱзгарын – шке ойыртемже, сылнылыкше. Семже сай гын, чыла семӱзгарымат колышташ йӧратем. Мылам фортепиано, ксилофон да тыгак моло ударный семӱзгар дене шокташ келша.
Катерина ШАБДАРОВА, самырык мурызо:
– Кӱсле юзо йӱкан улмыж дене келша. Ты семӱзгарын семже ныжылге, ласка, лыпландарыше. Тудо илаш вийым ешара.
А.БАЙКОВА ямдылен
