Марий Эл Радион хит-парадше
Йолташ-влак, тендан полшымо дене кодшо арняште мурызо-шамыч коклаштышт тыгайрак «тошкалтышым» чоҥеныт.
- Эльвира Попова – «Пеледше чон»
- Кристина Краснова – «Тый улат»
- Зинаида Александрова – «Шыже шонымаш»
- Карина Ватютова – «Йоча жапем»
- Анна Прохорова – «Шӱдыран кастене»
- Лариса Сидоркина – «Авай»
- Володя Матвеев – «Чылажат – шочмо верын»
- Станислав Шакиров – «Мотор игече»
- Станислав Устюгов – «Ошо ошым йӧрата»
- Татьяна Горшкова – «Уэш шыргыжам»
Йӧратыме мурызыланда ончыл верым налашыже кузе полшышашым огыда пале гын, ушештарена: 5533 кӱчык номерыш SMS-ым колтыман. Тӱҥалтыште МАРИ мутым возыман, вара, яра верым кодыде, мурын номержым шындыман. Муро лӱмым кавычкыш налман огыл. Йӱклымаш SMS-ПОРТАЛ-ыште кая.
Татьяна Горшкова Волжский район Пӧртанур ял гыч. Тудо Памар тӱвыра пӧртыштӧ культорганизаторлан тырша.
Мураш кум ий ончыч, тӱвыра аланыш пашам ышташ толмекыже, кумылаҥын. Кызытеш репертуарыштыже ик мурыжо – «Уэш шыргыжам» – уло. Мутым Христина Александрова возен, семжым шкеже келыштарен.
– Тиде муро илыш, чоншижмаш нерген. Илышыште кеч-могай нелылык вашлиялтеш гынат, вуйым сакыман огыл, а ончыко, сай вашталтышлан ӱшанен, эшеат волгыдынрак шыргыжалын, умбакыже кайыман, – ойла Татьяна. – Кызыт эше ик мурым ямдылем, тудым У ий деч ончыч калыкыш луктын шуктем манын ӱшанем.
Алевтина БАЙКОВА
Фотом еш альбом гыч налме
