Режиссёр Алексей Ямаев М.Шкетан лӱмеш Марий национальный драме театрыште 2003-2011 ийлаште пашам ыштен. Тынар ий жапыште тудо ятыр спектакльым сценыш луктын. Нунын кокла гыч иктыже – А.Волковын пьесыж почеш шындыме «Каче-влак» постановко.
А 30 сентябрьыште ты спектакль сценыште пытартыш гана ончыкталтеш.
— Жапше годым тиде пьесым марий театрын сценышкыже лукташ театрын тунамсе вуйлатышыже Юрий Петрович Русанов темлен ыле. Пьесе оҥай, шонаш таратыше. Адакшым ме тиде пьесым изишак вашталтенна. Ты пашаште мылам драматург Зинаида Васильевна Долгова полшен. Произведенийыште действий XX курымысо 70-ше ийлаште кая. А тиде жап мыйын илышыштем ик эн волгыдо кышам коден, вет тунам мыйын ача-авамын самырык пагытышт эртен, мый шочынам, — куан кумыл дене шарналта А.Ямаев.
Спектакльлан тусо жапысе муро-влакым Алексей Анатольевич шкеже чумырен, поген.
— А сценым художник-постановщик Сергей Иванович Таныгин дене мультипликационный семын сӧрастаренна. Вургем шотыштат утыждене тургыжланен огынал, тусо жапланак келыштаренна, — палемда режиссер. — А тылзе мучаште тудын пытартыш гана ончыкталтмыже нерген колмеке, мутат уке, кумылем изиш тодылалте. Кажне режиссёрлан шке шындыме спектакльже шерге, тудо шке шочшет гаяк чучеш. Марий драме театрын сценыж гыч тиде постановкым кораҥдаш ӱшандарыше амал уло докан. Туге гынат, мыйын шонымаште, ты постановкыш калык куанен коштын, а кугурак ийготан-влак шке самырык пагытышкышт пӧртылын кертыныт.
А.Байкова.
