КУЛЬТУР ДА ИСКУССТВО

Студент илыш: Книгагудыш «ревизор» толын

Йошкар-Оласе медицине колледжыште студент ден преподаватель-влакым ушышо театр студий ынде визымше ий пашам ышта. Тудым тунемме тӧнеж директорым алмаштыше Ольга Козлова вуйлата. Тымарте студий А.Чеховын «Юбилей», Н.Гогольын «Мёртвые души», А.Пушкинын «Барышня-крестянка», А.Островскийын «Гроза», Д.Фонвизинын «Недоросль» пьесышт почеш шындыме спектакльым колледжыште веле огыл, тунемме моло заведенийыштат ончыктен. Ты гана студент ден преподаватель-шамыч Н.Гогольын «Ревизор» пьесыже почеш шындыме спектакльым Ӱдырамашын тӱнямбал кечыжлан ямдыленыт да тудым колледж деч посна эше М.В.Ломоносов лӱмеш лицейыште, С.Г.Чавайн лӱмеш национальный книгагудышто модын ончыктеныт.

«Ревизорышто» городничийын рольжым информатикым туныктышо В.Бурдин, городничийын ватыжын рольжым психологийым туныктышо Е.Виногорова, Ляпкин-Тяпкин судьян рольжым сестринское дело да реаниматологийым туныктышо В.Шевнин, почтмейстерын рольжым анатомийым туныктышо А.Рогов, городничийын ӱдыржын рольжым С-22 группышто тунемше А.Иванова, Хлестаковын рольжым Ф-31 группышто тунемше А.Леонов, Осип тарзын рольжым Ф-21 группышто тунемше Е.Конев, частный приставын рольжым С-22 группышто тунемше А.Дедюхин модыныт. Техникылан Ф-12 группышто тунемше Е.Федоров мутым кучен.

Театр студийын у спектакльжым ончаш погынышо-влак артист-шамычым шокшын вашлийыныт, поснак Хлестаковын городничийын ватыжлан йӧратымыж нерген ойлымыжым – студентын преподавательын кидшым шупшалмыжым да марлан лекташ йодмыжым… Чын, ик шагат гыч городничийын окмакрак ватыжын образше гыч лекше Елена Альбертовна студент-влак деч эртыме темым кӱлынак ушештараш йодеш, вет театр театр дене, тӱҥжӧ – шинчымаш.

М.ИВАНОВА.

Опубликовать в Одноклассники

Добавить комментарий