«Театральное Приволжье» фестивальыште школ да студент коллектив-влакын спектакльыштым 1 октябрь гыч Юл кундем федерал округысо чыла регионышто телевизор дене ончыкташ тӱҥалыныт. Тиде оҥай проект Россий президент Владимир Путинын увертарыме Театр идалыкыште Юл кундем федерал округышто Россий Президентын полномочный представительже Игорь Комаровын полшымыж дене эртаралтеш.
Кодшо арняште В.Колумб лӱмеш республикысе йоча да самырык-влаклан книгагудыш погынышо-влаклан А.Я.Эшпай лӱмеш Козьмодемьянскысе искусство школ пеленысе «СемьЯ+» театр-студийын Л.Духанинан пьесыж почеш шындыме «Неужели меня нет» спектакльын видеоверсийжым ончыктеныт.
Спектакльыште пӱсӧ йодыш тарвана: йоча да ача-ава кокласе кыл, икшывын кушмо пагытыште вашлиялтше нелылык, илышыште шкем кычалме да молат. Самырык актёр-влак рольым сайын модмышт дене шонаш таратеныт, эсогыл шинчавӱдым луктыныт. Арам огыл тиде постановко дене театр-студий апрельыште Йошкар-Олаште эртаралтше «Театральная юность» фестивальыште 13 коллектив гыч гран-прим сеҥен налын.
Спектакльын видеоверсийжым ончаш Марий Эл правительстве председательын икымше алмаштышыже Михаил Васютин, тӱвыра, савыктыш да культур паша шотышто министр Константин Иванов, образований да науко министр Наталья Адамова да молат толыныт.
— Постановкышто моткоч кӱлешан да тачысе илышлан келшыше темым тарватыме. Тидым залыште шинчыше самырык-влакым онченат умылаш лие, — ойла Михаил Зиновьевич. — Тиде спектакльымшколышто ача-ава-влаклан эртаралтше погынымашыште ончыкташ кӱлеш. Кушкын толшо тукымын «неле» пагытше нерген нунат палышаш улыт да тыгодым полшышаш улыт.
— «Театральное Приволжье» проектын пытартыш этапыштыже мемнан республике сеҥышыш лектеш манын, чыла ӱшан уло, — шке шонымашыж дене палдарен культур министр. — Пьесе куштылгыжак огыл, но самырык актёр-влак чылажымат шӱм-чон вошт колтен, устан модыныт да ончаш толшо-влакым ӱшандареныт.
Ушештарена, кугу театр проектын пытартыш этапше ноябрьыште лиеш. Юл кундем федерал округышто мемнан-влак сеҥышыш лектышт манын, кумылан кажне еҥ смс-йӱклымашке ушнен, эн сай театр постановкылан йӱкшым пуэн кертеш.
Проектыш ушнышо чыла спектакльым кӧ ончаш шона гын, тыгай сайтыште муаш лиеш: Театральноеприволжье.рф.
А.БАЙКОВА.
Фотом книгагудын архивше гыч налме
