13 мартыште В.И.Ленин лӱмеш тӱвыра полатыште «Эстраде вернисаж» фестиваль-конкурсын гала-концертше эртен.
Тений тудо элнан президентше Владимир Путинын увертарыме Российысе калык-влакын икоян улмо идалыклан пӧлеклалтын.
Фестивальыш республикнан чыла районжо да олаж гыч участник-влак ушненыт. Нунын радамыште шкетын, икмынярын але ансамбль дене мурышо, куштышо да эсраде миниатюр театр-влак лийыныт. Чылаже 260 еҥ мастарлыкым ончыктен. Жюрин аклымыж почеш, эн ойыртемалтшышт, утларакше икымше степенян лауреат лӱмым налше-влак, гала-концертыште кумылым нӧлтеныт.
Сценыште муро-влак рушла, марла, татарла, армянла да грузинла йоҥгалтыныт. «Гравитация» (Йошкар-Ола), «Куан памаш» (Морко район) ансамбль-влакын, «Звукоград» студийын да Людмила ден Ульяна Трудаловамытын мурышт Марий кундемнан моторлыкшо, кугезе йӱла ден тӱвырам палыше да арален кодышо, унам вашлийын моштышо да пашам йӧратыше калыкна дене кугешнаш таратеныт.
Спецопераций темат тӱҥ верым налын. Татьяна Галкинан (Советский район) «Победить», Надежда Крылован (Медведево район) «Эргымлан», Яна Горелкинан (Йошкар-Ола) «Мы – русские», «Живая вода» ансамбльын (Волжск ола) «Ты держись, боец» мурыштым ончышо-влак тушман ваштареш кредалше-шамычым шарналтыме да, нунылан вийым ешарыме семын, кынел шогалын шинчавӱд йӧре колыштыныт.
Ӱдырамашым, авам чапландарыше муро-влакым Эдуард Зырин (Советский район) «Женщина – воздух», Ваник Мкртумян «Mayrik» (Юрино район) йоҥгалтареныт, шокшо кидсовышым суленыт.
Калык лӱмым нумалше «Ассорти» ансамбльын «Алло, мам!» куштымашыже залыште шинчыше кажне аван кумылжым тодылын. Аван шке шочшыж верч колянымыжым, тудын йыҥгыржым да кеч ик-кок шомакым пелештымыжым изин-кугун шӱм вургыжын вучымыжым куштымаш йылме дене тыге чаткан да моторын ончыктен моштымыштлан – кугу чап.
Курыкмарий район гыч калык лӱм дене палемдалтше «Аяр» группат эстраде аланыште профессионал семын шукертак палыме. Нине коллектив-влакын тыршен пашам ыштымышт, репертуарыштым кажне гана у да ойыртемалтше куштымаш але муро дене пойдарымышт палынак шижалтын. Сандене Гран-прим пӱжвӱд дене сулен налме кугу наградыштлан шотлаш лиеш.
Ончыкшымат пашада вораныже, тӱвыргӧ лектышан лийже!
Ты мероприятийым Республикысе Калык усталык да тӱвыра ден каныме паша шотышто шанче-методике рӱдер кок ийлан ик гана эртара.
Алевтина БАЙКОВА
Фотом Калык усталык рӱдерын альбомжо гыч налме
