Кугу Отечественный сарыште Сеҥымылан 74 ий темме лӱмеш парадым эртарыме кечын Йошкар-Олан уремлаж дене уэш военный технике эрта. Тыге кутырен келшыме Марий Элым вуйлатыше Александр Евстифеевын правительстве член-влак дене пашаче вашлиймашым эртарымыж годым.
Марий Эл правительстве председательын алмаштышыже Степан Воронцов тыге увертарен: Сеҥымаш парадлан ямдылалтме репетиций 12 апрельыште тӱҥалеш. Чылаже вич тренировко лиеш, тышеч кокытыштыжо механизироватлыме колонно-влак участвоватлат.
Вашлиймашке погынышо-влак «Бессмертный полк» акцийым эртарыме нерген йодышым посна каҥашеныт. Тений Кугу Отечественный сар ийлаште колышо коча ден кугезе коча-влакым порын шарнымым ончыкташ фронтовик-влак дене пырля колонныш шогалаш 30 тӱжем утла еҥ кумылаҥын.
Александр Евстифеев Марий Элыште илыше-влаклан «Бессмертный полк» акцийыш ушнышашлан фронтовик-влакын портретыштым ямдылаш йоным ышташ правительстве член-влаклан кӱштен.
Марий Элым вуйлатыше тыгак 9 Майлан ямдылалтме шотышто икмыняр моло йодышым тарватен.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен