Тыгай лӱман музыкальный акций элна мучко 9 Майыште эртаралтеш.
Шарнымаш да чап идалыкыште тыгайым эртараш духовой оркестр ден духовой да ударный семӱзгар-влакым шоктышо-шамычын В.Халилов лӱмеш «Духовое сообщество» ассоциацийышт темлен.
Акций-марафоныш профессиональный музыкант веле огыл, а музыкым йӧратыше кажне еҥ ушнен кертеш. Участник-влак 12 шагат кечывалым Давид Тухмановын мурыжым пачерысе окна але балкон гыч мурышаш улыт да шке выступленийыштым, видеош войзен, #окнопобеды хэштег дене соцсетьлашке вераҥдышаш улыт.
Акций Российысе национальный музык тоштерын да В.Д.Поленов лӱмеш Россий кугыжаныш калык усталык пӧртын полшымыж дене эртаралтеш.
А.БАЙКОВА
