24 январьыште Марий Эл Республикын Ялозанлык да продовольствий министерствыштыже 2017 ийыште эртыше «Районын кечыже» ялозанлык ярмиҥга конкурсым иктешлыме.
Тиде конкурс рынкыш верысе сатум утларак лукмо, тыгодымак ужалыме, калыкым обслуживатлыме культурым нӧлталме амал дене эртаралтын.
2017 ий мучко Йошкар-Оласе В.И.Ленин лӱмеш площадьыште да «Чарла кремль» увер-турист рӱдер кумдыкышто гӱжлышӧ ялозанлык ярмиҥгаш Районын кечыжым палемдаш регионысо чыла кундем да Йошкар-Ола ушненыт.
Конкурс комиссийын председательже, Марий Эл Республик правительствын председательжым алмаштыше Ю.Сидыгановын вуйлатымыж почеш регионысо ялозанлык да продовольствий министр А.Гречихо, моло министерстве ден ведомствын, муниципальный образований-влакын еҥышт конкурсым иктешленыт. Икымше верым ик йӱкын Медведево районлан пуэныт, кокымшым – Килемар районлан, кумшым – Оршанке районлан. Сеҥыше ден призёр-влакым Марий Эл Республикын Ялозанлык да продовольствий министерствыжын I, II да III степенян дипломжо-влак дене палемдат, «Ялозанлык ярмиҥгам организоватлаш да эртарен колташ полшымылан» посна таумут дене – Йошкар-Олам, «Марий кудым ойыртемлатшын организоватлымылан» таумут дене – Юрино ден Курыкмарий районлам. Моло район-влаклан Марий Эл Республикын Ялозанлык да продовольствий министерствыжын «2017 ийыште ялозанлык ярмиҥгаште участвоватлымылан» таумутым кучыктат.
Тыгай сынан ялозанлык ярмиҥгам эртарыме сай опытым, регионысо калыкын да рӱдолаш толшо уна-влакын кумылыштым шотыш налын, Марий Эл Республикын Ялозанлык да продовольствий министерствыже регионысо районла да Йошкар-Ола администраций дене пырля 2018 ийыштат «Районын кечыже» ялоазнлык ярмиҥга конкурсым эртараш кутырен келшеныт. Тудын графикшым Марий Эл Республик правительствын официальный Интернет-порталыштыже муаш лиеш.
М.ИВАНОВА.
