Кодшо кечылаште Марий Элысе Кугыжаныш автоинспекций управленийыште пресс-конференций лийын. Журналист-влакын йодышыштлан тӱҥ кугыжаныш инспектор полиций подполковник Юрий Есипов ден управлений начальник полиций подполковник Андрей Шабалин вашештеныт.
Пресс-конференцийыште республикыште 2024 ий тӱҥалтыш гычак корно туткар, тушто колышо да сусыргышо-влакын чотышт шукемме дене кылдалтше йодыш-влак нерген мутланеныт. Палдарыме почеш, тений кум тылзе жапыште гына 100 ДТП лийын. Тушто 19 еҥ ӱмыр лугыч лийын, 140 еҥ эмганен. Кызытсе жаплан эн шӱлыкан сӱрет – Волжск олаште да ты районышто, тыгак Шернур ден Советский районлаште.
Юрий Есиповын ойлымыж почеш, туткар лийме тӱҥ амал – утыждене писын кудалыштмаш. Поснак – уда игечыште да локтылалтше корнышто. Тыгак ончылно улшо транспортым эртен кайышашлан ваштареш полосашке лекме годым шуко ДТП лиеда. Сандене корнышто келшыше скорость дене кудалыштман, палемден тудо.
Тыгак Йошкар-Олаште да моло илемлаште туткар шуэн огыл корно-влак ушнымаште да йолешке-влак эртыме верлаште лиедыме нергенат ойлен. Йолешке-шамыч шкештат кокланже аварийлан амалым ыштат. Кеч ДТП шагалрак лийже манын, нине верлам утларак волгалтарыме гынат, кызытеш сӱрет сай велыш вашталтын огыл гаяк. Тиде амал денак ийготыш шудымо-влаклан корно правилым туныктымо йодыш пӱсын шога. Республикысе правительстве, верысе самоуправлений орган-влак дене корным вончаш палемдыме верлам умбакыжат нормативный состоянийыш кондышаш, нуным эшеат сайын волгалтараш ешартыш оборудованийым, тыгак фотовидеофиксаций у комплекс-влакым вераҥдышаш нерген йодыш-влак каҥашалтыт.
Пресс-конференцийыште Юрий Есипов журналист-влаклан еҥ-влакым кӱлеш увер-влак дене палдарыме, тӱрлӧ туткар лийме деч шижтарыме пашам чолган шуктымыштлан тауштен.
Л.Камалетдинова
Фотом Марий Элысе ГИБДД управленийын сайтше гыч налме
