«Покровский хутор» казак обществын (Волжский район Купсола села) «Клинок» командыже Нижегородский областьыште эртыше «У смене-2021» рошто турнир гыч кубок дене пӧртылын.
Армейский рукопашный кучедалмаш дене таҥасымаш 9 январьыште Дивеево селасе монастырь пеленысе православный школын спортзалыштыже эртен. Тушто Нижегородский область да пошкудо регионла гыч толшо тӱрлӧ ийготан рвезе-влак вийыштым тергеныт. Марий Эл гыч кадет команде кокымшо верым сеҥен налын.
Финалыш «Клинок» командын чыла боецше лектын: Никита ден Иван соперникыштым корштарыме (болевой) технике дене сеҥеныт гын, Данил ден Стас – перыме технике дене. Тыге, Н.Браслетов ден Д.Семёнов 1-ше вер дене палемдалтыныт, И.Михайлов ден С.Филиппов – 2-шо вер дене. Эн изи боец Ярослав Колесников 1 баллым модын колтен.
— Кучедалмаш пеш неле лийын, поснак- мыланна, вет тыгай кӱкшытыш икымше гана лектынна, — манеш командым вуйлатыше Александр Глухов. – Мыланна чыла шотыштат, поснак таҥасымашке миен толаш полшышо протоиерей Евгений Усковлан, Эдуард Кузнецовлан, ача-ава-шамычлан – кугу тау.
М.ИВАНОВА
