КУЛЬТУР ДА ИСКУССТВО

«Сареш когаргыше пӱрымаш»

«Шочмо мландын кугу вийже» калык усталык фестиваль умбакыже шуйна. Кодшо шуматкечын Курыкмарий районысо коллектив-влак мастарлыкыштым ончыктеныт.

Тыге маналтын Курыкмарий районысо усталык коллектив-влакын концерт программышт. Тиде кундем гыч фронтыш 13 тӱжем утла салтак каен, нунын кокла гыч мӧҥгыжӧ 6 тӱжем еҥ пӧртылын. Сарын кочо илышыж нерген районышто улыжат 2 ветеран гына ойлен кертеш.

Концерт программым кӱслезе-влакын «Шыжарвлӓ» ансамбльын шоктымыж дене почыч. Действий санаторийын кудывечыштыже эрта. Ожно Курыкмарий районысо Йоласал ял воктене санаторий лийын. Тушто тыглай калыкат илен, йоча-влаклан туштак школ лийын. Мутат уке, Кугу Отечественный сар годым сусыргышо салтак-влакым  тушто эмленыт. Концертыште тидым шкеат «ужын кертна». Ик салтак (Николай Марышев) яра жапыштыже шашке дене модаш йӧрата, весе (Алексей Домрачев) гитарым шокташ кертеш, Украина гыч толшыжо (Андрей Гаранин) медшӱжар да тусо йолташыже-влаклан тӱрлӧ историйым каласкала. Лач сокыр салтак (Николай Зубков) шып: тудым йӧратыме ӱдыржӧ кудалтен коден. А вес салтак (Михаил Анисимов) – сӱретче. Тудо санаторийын врачше, медшӱжарже да йоча-влакым сӱретла. Тусо пашаеҥ-шамычын йочашт нунылан полшеныт, салтак-влакын вӱран бинтыштым мушкыныт. Салтак-влакым эмлаш нимогай эм ситен огыл, садлан санаторийын тӱҥ врачше (Сергей Барбосов), черле-влакын ӱшаныштым йомдараш огыл манын, порым тыгыдемден пуэден. Туге шол, вет кертме семын илен лекташ тыршеныт. 

Сар жапыште туныктышо (Виктория Суворова) икшыве-влакым Марий республикым чоҥымылан 25 ий темме вашеш концертлан ямдылен. Лач изи ӱдыр (Анна Элянова) шӱлыкан коштын. Тудо кажне гана самолёт-влакын чоҥештылмышт годым ачажын толмыжым вучен да теве тудо, куан тат, толынат шуын: ачаже таза пӧртылын. Кажне авалан пелашым, икшывылан ачам вашлияш – кугу пиал.

Курыкмарий артист-влак палемдыме рольыштым сайын модыч, образыш келгын пурышт. Нунын дене пырля залыште шинчыше-влакат ойгырышт, вучышт, а вара — куанышт. Теве тыгай илыш лийын 75 (але изиш ондыкырак) ий ончыч Курыкмарий кундемыште чодыра коклаште верланыше санаторийыште. Кызыт тидым сценыште модын ончыктат гынат, могырлан копыж-ж лиеш, шинчавӱд лектеш. А тунам, Кугу Отечественный сар годым мемнан иктаҥашна-влак шке шинчашт дене ужыныт, коваштышт дене шижыныт.

А.БАЙКОВА

Опубликовать в Одноклассники

Добавить комментарий