Лумшо Марий самырык тукым слёт тений 2-8 июльышто Шернур районысо Марисола школышто эртышаш.
Кодшо арня мучаште Шернур район администрацийыште ты шотышто кугу мутланымаш эртен. Тушко «Российысе марий-влак» ФНКА вуйлатыше Л.Яковлева, Мер Каҥаш вуйлатышын алмаштышыже В.Мочаев да республикысе Марий тӱвыра рӱдер директор Н.Пушкина миеныт. Район администраций вуйлатыше С.Адиганов дене пырля нуно ты мероприятийым эртарен колтымо радам шотышто каҥашеныт.
Мо дене тений слёт куандара? Марисола кундемын лӱмлӧ еҥже-влак дене вашлиймаш, актер мастарлык шотышто мастер-класс-влак, сылнымут гостинныйым почмаш, марий кечышот дене кылдалтше йӱла мероприятий лийыт. Слёт кышкарыште тыгак тӱрлӧ темылан лекцийым лудыт, компьютер технологийыш марий йылмым шыҥдарыме дене кылдалтше практический занятий-влакым эртараш шонат.
Самырык тукым слётыш 18-30 ияш ӱдыр-рвезе-влак ушнен кертыт. Чылаже 120 наре еҥ погынышаш.
Тудын организаторжо-влак Марисола школышто лийыныт. Тудын директоржо А.Максимова дене пырля слётым эартыме дене кылдалтше тӱрлӧ организационный йодышым каҥашеныт.
С.Носова.
