Самырык-влакын кечышт вашеш республик вуйлатышын пашажым жаплан шуктышо Александр Евстифеев Марий Элысе молодежный парламентын да самырык-влакын правительствыштын членышт, волонтер, мер ушем-влакын чолга ӱдыр-рвезышт, военно-патриотический клуб, экологический да икмыняр моло отрядын участникышт-влак дене вашлие.
Тудо погынышо-влакым пайрем дене саламлыш да нунылан тыгаяк чолга лияш, командыште пашам ышташ тунемаш, шке финанс грамотностьым вияҥдаш тыланыш.
— Самырык-влакын пайремышт вес пагытыште лийын кертеш манын, мый шоналтенат ом керт. Тиде самырык-влаклан келшенат огеш тол ыле. Раш: тиде кеҥеж, сай игече лийшаш. Лач тиде тендан кумыллан келшен толеш, — ойлен Александр Евстифеев.
Марий Эл вуйлатышын пашажым жаплан шуктышо самырык-влак дене кугыжаныш молодежный политикым илышыш шыҥдарыме, аракам йӱмӧ да тамакым шупшмо ваштареш профилактике пашам эртарыме, таза илыш йӱлам кучымо, уремысе спорт модмаш, икмыняр моло дене кылдалтше йодыш-влакым каҥашыш. Южо шотыштыжо шылталенракат ойлыш.
Республикыште самырык-влак дене могай паша да кузе эртаралтме нерген Марий Элысе науко да образований министерствын молодежный политике шотышто управлений начальникше Станислав Игошин палдарыш. Тудын палемдымыж почеш, кызыт мемнан кундемыште самырык да йоча-влакын 26 мер ушемышт пашам ышта. Нунын радамыш 32 тӱжем еҥ ушнен. Самырык-влакын политикыштын тӱҥ направленийже-влак ӱдыр-рвезе-шамычын усталыкыштым вияҥдымылан, таза илыш йӱлам кучымылан, патриотизм шӱлышеш куштымылан, научный да интеллектуальный пашам эртарымылан, паша верым муаш полшымылан пӧлеклалтыныт. Регионлаште кугыжаныш молодежный политикым илышыш шыҥдарыме пашам эртарымым аклыме дене келшышын, элысе 85 кундем кокла гыч Марий Эл кокымшо тӱшкашке пура да 24-27 верым айла.
Вашлиймаш мучаште Александр Евстифеев Марий Эл Республик вуйлатыше пелен Молодежный политике шотышто каҥашым ышташ темлымым, муниципал образованийлаште да республикысе самырык-влакын рӱдерлашкышт молодежный политике кадр составым вияҥдаш кӱлмым сайлан шотлыш. Тыгак самырык-влакым чолгалыкым утларак ончыкташ, шке нерген эшеат мастарынрак палдараш ӱжӧ.
Любовь Камалетдинова.
