ОБРАЗОВАНИЙ

Салам, пионерий!

Пионер толкынлан – 95 ий

Салам, пионерий!

Тыгай девиз дене Марий Турек поселкысо кыдалаш школышто ешартыш образованийым пуышо районысо рӱдер  пионерийын слетшым эртарен.

Эрден эрак пайремыш районын чыла школлаж гыч йошкар галстукым пидше ӱдыр-рвезе-влак вашкеныт. Йоча-шамыч  дене пырля пионер толкынын ветеранже-влак, кугурак пионервожатый-шамыч каеныт. Нунын кокла гыч эн самырыкше ынде 50 ийымат эртен, а южыжо 80 ийышкат тошкалын. Ветеран-влакым ончычсо пионер манаш йылме ок савырне. Кажныже йочалан полышым пуаш, ты толкынын ончылъеҥже лияш ямде.

Слетышто делегаций-шамыч пионер организацийышт, нунын историйышт  дене палдареныт, а фойеште районысо школ-влакын пионер дружиныштын пашашт дене кылдалтше выстакым ончаш йӧн лийын.

Мероприятийым Сысоево кыдалаш школын самырык барабанщикше-влак почыныт. Тушто кызытат совет жапысе гай пионер дружине уло. Йоча-влакым ончычсо семынак пионерыш пуртат, йошкар галстукым пидыт. Тусо дружине Совет Ушем Герой С.Суворовын лӱмжым нумалеш. Ты делегацийым Йошкар-Ола гыч мийыше Тамара Бердинцева вуйлатен. Тудо шке жапыштыже ты школышто пионервожатыйлан ыштен.

Пайрем чайым йӱмаш дене мучашлалтын. А 19 майыште, Пионерийын шочмо кечынже,  ты школыштак толкынын лӱмгечыжлан пӧлеклалтше ача-ава-влакын погынымашышт эртен. «Эр вий» йоча организаций  «Шокшо шӱман айдеме-влаклан» акцийым эртарен: пионер толкынын ветеранже-влакым саламлен.

В.ЗАЙЦЕВ.

Авторын фотожо.

Снимкыште: Пионер толкынын 95 ияш лӱмгечыжлан пӧлеклалтше пайремыште.

Опубликовать в Одноклассники

Добавить комментарий