ОБРАЗОВАНИЙ УВЕР ЙОГЫН

Нуно шинчымаш тӱняшке корным почыт

Теҥгече Марий Элысе Конгресс-влак полатыште туныктышо-шамычым профессионал пайремышт дене саламленыт.

Эн ончыч мутым республикым вуйлатыше А.Евстифеев налын. Тудо кундемыштына педагог-влакын тӱрлӧ конкурсыш кумылын ушнымышт, профессионал кӱкшытышт кушмо нерген каласен. Тыгак самырык туныктышо-влакын чотышт шукеммым палемден. Кодшо тунемме ий мучаш гыч тенийысе тунемме ий тӱҥалтыш марте тудо 15,5 процент гыч 16 процент марте кугемын.

Тенийысе ЕГЭ-н результатше ончыктен: республикысе кокла баллын кугытшо Российысе деч кугырак. Тыгак кундемнан 11 тунемме организацийже Российыште эн сай шинчымашым пуышо заведений радамыш пура. Республик вуйлатышын мутшо почеш, конкурсыш ушнымаш педагогын творческий усталыкшым вияҥда. Тидым «Идалыкын туныктышыжо» Российысе конкурсышто Медведево посёлкысо 2-шо №-ан школын тӱҥалтыш класслаштыже туныктышо Татьяна Анисимова ончыктен. Тудо 15 эн сай туныктышо радамыш логалын да Россий Президент В.Путин дене вашлиймаште лийын.

Регион вуйлатыше  у школым, йочасадым чоҥымо нергенат ойлен. Тидлан 2019 ийысе бюджетым ыштымаште кугу верым ойырат. Тений республикыште кум у йочасад почылтын. Тыге кум тӧнежышке 455 икшыве коштеш.  Идалык мучаш марте  кок йочасадым нӧлтен шуктышаш улыт. Тыгак вич у йочасадым да улшо йочасад воктеке ешартыш оралтым чоҥаш тӱҥалыт. Тыге 1345 икшывылан  вер лектеш. Параньга район Элпанурышто у школым вашке почыт. А октябрь мучаште Йошкар-Оласе Индешымше микрорайонышто  825 веран школым чоҥаш тӱҥалыт.

Варажым Александр Александрович Козьмодемьянск оласе 1-ше №-ан школын туныктышыжо Вера Перовам «Россий Федерацийын сулло туныктышыжо» почётан лӱмым пуымо дене саламлен. Тыгак тиде кечын Квалификацийым вияҥдыме регионысо методике рӱдерым вуйлатышын алмаштышыже Т.Вязникова, Торгово-технологический колледжын директоржын учебно-производственный паша шотышто алмаштышыже Г.Наумова, Семёновский школ-интернатын директоржо В.Никитин, Марий Турек район Нартас школын директоржо В.Семёнов, Бауман лицейыште историйым да обществознанийым туныктышо И.Кудрявцева  «Марий Эл Республикысе образованийын  сулло пашаеҥже»  лӱм дене палемдалтыныт.

Полатыш чумыргышо-влакым тыгак Марий Эл правительстве председательын икымше алмаштышыже М.Васютин, Кугыжаныш Погын председательын алмаштышыже О.Цветкова, образований да науко министр Н.Адамова саламленыт. Михаил Васютин правительствын Почетан грамот ден Тауштымашыжым икмыняр еҥлан кучыктен. Н.Адамова кундемнан вич эн сай туныктышыжым 200 тӱжем теҥгеаш грантым налме дене саламлен. Нуным  Россий Президентын 2010 ий 28 январьысе 117-ше №-ан  «О денежном поощрении лучших учителей» указше дене келшышын ойыреныт.  2006 ий гыч «Образований» национальный приоритетный проект полшымо дене тыгай грантым республикыште 276 туныктышо налын.

Тыгак Программный обеспечений шотышто разработчик-влакын «ПС СОФТ» ассоциацийыштын еҥже  эртыше идалыкыште профессионал пашаште ойыртемалтше икмыняр педагоглан 10 тӱжем теҥгеаш сертификатым пуэн.

Туныктышо-шамычлан изирак концертым Национальный президент школ- интернатын тунемшыже ден И.С.Палантай лӱмеш тӱвыра да сымыктыш колледжын студентше ден туныктышыжо-влак ончыктеныт. Г.Гладковын саксофон дене шоктымыжо  кажнын кумылжым налын. А  колледж гыч скрипач-влакын Я.Эшпайын ныжыл семжым йоҥгалтарымышт годым юзо тӱняш логалмыла чучын.

Л.ШАБДАРОВА.

Д.Речкинын фотожо.

Опубликовать в Одноклассники

Добавить комментарий