20 майыште «Россия 1» телеканал дене эртаралтше «Пятеро на одного» интеллектуальный программыште Параньга районысо Усола школын директоржо Михаил Богданов 100 тӱжем теҥгем модын налын.
100 тӱжем теҥгеаш йодышыжо тыгай лийын: «Физик Роберт Лэнгын могай увлеченийжылан кӧра тудо безопасность кӱпчыкым шонен луктын?» Вич еҥан телевизионнный команде гыч иктыжат чын вашмутым каласен кертын огыл. А командыштыже Александр Носик, Ольга Шелест, Андрей Ургант, Альбина Джанабаева и Александр Пушной лийыныт. Мучашлан вӱдышын полшымыж дене гына вашмут лектын. Но окса Усола школ директорлан каен. Михаил Алексеевич декше эше миен шуын огыл. «Можыч толынжат ок шу», — манеш тудо шкеже, но ӱшанже уло.
Михаил Алексеевич ынде 20 ий наре школ директорлан ышта. Химий ден биологийым туныкта. Пытартыш жапыште физкультурым, труд урокламат наҥгаяшыже логалеш. Но тидын дене пырля икшыве-влаклан «Что?Где?Когда?» интеллектуальный модышым эре эртара. Тыгак тудо спортивный ориентированийлан, радиопеленгацийлан шӱмаҥда. Школын тунемшыже-влак тӱрлӧ кӱкшытан таҥасымашлаште эре ойыртемалтыт. «Юный турист» кружокымат наҥгая. Кажне ийын кеҥежым йоча-влак дене пырля турпоходыш коштыт. Теве кодшо ийын Немда эҥер дене воленыт (снимкыште).
С.Носова.
Фотом М.Богдановын Интернетысе лаштыкше гыч налме.
