Марий Элын Молодёжный политике, спорт да туризм министерствыжын увертарыме «Марий Эл Республикысе туризмын лидерже» конкурсшо иктешлалтын.
Марий кундем Россий мучко путешествоватлен коштшашлан ик эн сайын вияҥше регионлан шотлалтеш. Тушто илышыш шыҥдаралтше проект-влак ӧрдыж гыч толшо турист-влакын кумылыштым савыренак шогат. Сандене конкурс гоч палемдышашлык организаций, посна еҥ-влак уке огытыл.
Тыге, «Идалыкын окрытийже» номинацийыште икымше верыш «Изба» ООО, кокымшыш Йошкар-Ола историй тоштер пелен пашам ыштыше Турист- увер рӱдер, кумшыш Звениговысо межпоселенческий библиотеке лектыныт.
«Массовый информаций средствылаште Марий Эл Республикын турист продуктшым шӱкаш полшымаш» номинацийыште икымше вер дене «Марий Эл» газетын журналистше С.Носова, кокымшо вер дене «Край Горномарийский» газет гыч В.Ёлкин, кумшо вер дене «Край Сернурский» газет гыч Е.Тетерина палемдалтыныт.
«Марий Эл мучко идалыкын эн сай маршрутшо» номинацийыште икымше вер предприниматель А.Степановлан, кокымшо вер Звениговысо межпоселенческий библитотеклан да кумшо вер Юрино районысо Социокультурный комплекс гыч Т.Борисовалан логалыныт.
А теве «Идалыкын эн сай экскурсийже» номинацийыште Йошкар-Ола историй тоштер гыч М.Рыбаков ойыртемалтын. «Идалыкын эн сай турист сувениржылан» «Яндар» ООО-н чайжым шотлымо. А «Идалыкын эн сай турист продуктшо» Йошкар-Ола историй тоштерын лийын.
Н.Волкова.
