Теҥгече Марий Эл Республикын Рӱдӧ сайлымаш комиссийжын председательже Ирина Татаринова брифингым эртарыш. Тушто Марий Элын ЦИК-шын «Сайлымаш участкыш ӱжмаш» у проектшын презентацийжым эртарыш. Тудым 2018 ий 18 мартыште Россий Федерацийын Президентшым сайлымашлан ямдылалтме да тудым эртарыме годым пӱтынь Марий Эл мучко илышыш шыҥдарат.
— Пачер ден пӧрт еда участковый избирательный комиссий-влакын членышт кошташ тӱҥалыт. Тиде паша 19 февраль гыч 12 март марте шукталтеш. Тӱҥ шонымашыже – сайлыше-влакым 2018 ий 18 мартыште лийшаш сайлымашке пагален ӱжмаш, — каласыш Ирина Татаринова. — Тиде проектым илышыш пуртымо годым комиссий-влакын членышт избиратель-шамычлан сайлымаш кунам лийшаш, избирательный комиссий-влак кушто верланыме нерген каласат, телефон номерыштым пуат. Тыгак кузе йӱклышаш нерген умылтарат да сайлыше-влакын спискышт дене палдарат.
Республикысе ЦИК председательын палдарымыж почеш, пачер ден пӧрт еда коштмышт годым УИК член-влак еҥ-шамычын сайлымаш кампаний кузе эртыме, избиратель-влакын могай правашт улмо да пуымо моло йодышыштланат вашештат. Тидын дене пырля 2018 ийысе сайлымаш кампаний шотышто увер материал-влакым кучыктат.
Кызыт пачер ден пӧрт еда тӱрлӧ осал шонымашан еҥ-влакат коштыт. Сандене еҥ-влак кӧ толмым вигак ужышт да палышт манын, сайлымаш комиссий-влакын членыштын ӱмбал вургемыштышт посна знак лиеш. Южышт сайлымаш кампанийын символжым ончыктыман накидкым чият. Тыгак УИК-ын кажне членжын пеленже удостоверенийже да паспортшо лийыт. Нуно еҥ-влак деке паша кечылаште кастене 17 шагат деч вара мият.
Любовь Камалетдинова.
