Марий Элнан эн шергакан поянлыкше – ужар чодыра – ынде 18 август годсек йӱла. Россий МЧС-ын Марий Элысе тӱҥ виктемжын ма регионысо СМИ-влакын уверлаштым республикыште илыше кажне еҥ шӱм-чон вургыж эскера. Кажныже тулым писынрак йӧртымым вуча, Юмо дечын йӱрым сӧрвала, кертмыж семын пожарный ден доброволец-влаклан полша… Икте мӧҥгыштыжӧ але паша верыштыже тургыжлана гын, весе тулым чактараш чодырашкак шке кумылын кая. Нунын кокла гыч Кугыжаныш да муниципальный службо колледжын курсантше Никита Скулкинымат (снимкыште) палемдаш лиеш.
Тений 18 ийым темыше Никита Йошкар-Олаште ила. Чодыра пожарым йӧрташ доброволец-влакым погымо нерген уверым колмек, рвезе нунын тӱшкашке кокытеланыде возалтын. Икымше кечын Кугу Мартын ер велыш наҥгайыше корнышто тулым пурла вечын шолашке вончымыж деч ороленыт. Тиде кастене рвезылан мӧҥгыжӧ пӧртылаш логалын – тулшолгым кроссовкыжым йыклык «кочкын». Вес кечын Никита берцым чиен. Тудын дене пырля ик группышто тунемше рвезат тарванен. Ты гана нуным Щучье ер кумдыкышто торфан верлам йӧрташ наҥгаеныт. Тул поснак мардеж тарваныме годым орышо гай шарлен, сандене рвезе-влак йӱдлан чодыраштак кодаш кутырен келшеныт. «Йошкар агытанын» эр велеш изиш лыпланымекше, доброволец-шамыч, мландыш возын, изишак нералтеныт, мыняр-гынат вийым погеныт, а вара адакат пашалан пижыныт. Кумшо кечын Скулкинмыт Чуркан ерыш наҥгайыше корнышто тулым йӧртеныт…
– Тиде мыйын, манмыла, икымше боевой крещением лийын, – манеш Никита. – Пожарныйлан кок ий тунемынам, но тулым икымше гана йӧртенам. Теорий практикыште пеҥгыдемдалтеш, маныт: мом туныктеныт гын, чылажат кӱлеш лийын, лачеш толын. Регионысо кучемын, МЧС-ын, пожарный-влакын, техникын, авиацийын да молын пашаштым шке шинчам денак ужынам да виян улмынам умыленам. Тыгак пожарыште юж ден мландын мынярак ырен кертмыштым пален налынам… Кокымшо гана тулым йӧрташ келшышын чиен каенам гынат, берцем йолешемак левен, могыр коваштем икмыняр вере когарген… Конешне. чот шокшо, чот неле, чот шучко… Но мый садак пожарный лиям! Жапым шуйкалыде ыштен шукташ кӱлмӧ пашам ик-кок кечыште шотыш кондем да, доброволец-влак умбакыжат кӱлыт гын, тулым йӧрташ эше каем. Ик велым, тиде мыйын – ончыкылык пашам, сандене опытым погаш уто огыл, вес велым, мый патриот улам, шочмо кундемемым, поснак пӱртӱсым, моткоч йӧратем.
Кугыжаныш да муниципальный службо колледжын администрацийже Никита Скулкинлан чодыра пожарым йӧрташ полшымыжлан Таумутым увертарен.
М.ИВАНОВА
