УВЕР ЙОГЫН

«Канде тулым» мыняр вучаш лиеш?»

Тыгай йодышым Курыкмарий район Ольокансир, Изиксола, Варашангыр, Сануксола, Пертюк яллаште илыше калык нӧлталын да арам огыл – шушаш ийын нунын пӧртышкат газым пуртат.

Но тиде пашам ышташ аукционым Общероссийский калык фронтын регионысо отделенийжын чолга еҥже-влакын Марий Эл Правительствыш  йодмаш дене лекмекышт гына увертареныт. А тидын деч ончыч палемдыме яллаште илыше калык деч «Фронтыш сигнал» кнопкыш серыш-влак пуреныт, тушко еҥ-влак полышым йодын возеныт. Нунын серымышт почеш, 2012 ийыште муниципалитет администрацийын темлымыж почеш «Сануковский» кооператив шочын, тушко 102 сурт пурен. Кум ийыште калык ялласе уремлаште, кудывечылаште «канде тулым» пурташ монтаж пашам ыштен, газ котёл ден счётчик-шамычым шындылын. Тидлан чумыр налмаште 6 миллион утла теҥгем кучылтын. Чыла ямдыленыт, газ пучым гына колташ. Тидыжым 2016 ий кеҥежланак ыштен шукташ сӧреныт, а газ тачат уке. Объектым «2019-2023 ийлан Марий Эл Республикыште газификаций да газоснабжений» республиканский программыш 2022 ийлан гына пурталтын. Мутат уке, верысе калык тиде йодышым нӧлталын да арам огыл: тиде кечылаште кугыжаныш закупко сайтыште увертареныт: объектым чоҥаш подрядчикым кычалыт. Контракт почеш пашан акше 19 миллион теҥге. Газ пучым 2020 ий 31 январь марте пуртен шуктышаш улыт.

«Конешне, тиде увер верысе калыкым веле огыл, мемнамат куандарен. Подрядчикым кычалме паша кужун ок шуйно да жапыштыже чоҥаш тӱҥалыт манын ӱшанена», — Калык фронтын регионысо штабшын сопредседательже Р.Гизатуллин манын.

Г.Кожевникова.   

Опубликовать в Одноклассники

Добавить комментарий