15 сентябрьыште Российын икмыняр олаштыже Студент-влакын парадышт эртен. Мероприятийыш Марий Элат ушнен. Тиде кечын тыгак икымше курсыш тунемаш толшо ӱдыр-рвезе-шамычым студент радамыш пуртеныт.
Йошкар-Олан уремлаже ик татлан самырык-влакын юарлымышт дене авалталтын. Нуно Марий Элын рӱдолаж дене воштылын, мурен таҥ тошкалын эртеныт. Парад Оболенский-Ноготков площадьыште тӱҥалын. Корно мучко ӱдыр-рвезе-влак, флажок ден шарым рӱзен, шке тунемме вузын, ссузын лӱмыштым кычкырлен ошкылыныт.
Студент-влакын радамышт шкешотан толкыным ушештарен. Тушто Российыште илыше гына огыл, тыгак тӱнямбалне илыше тӱрлӧ калык иквереш эртен. Тыгодым уремыште нуным вашлийше еҥ-влакын кумылышт нӧлталтын, очыни, студент пагытыштым шарналтеныт.
Варажым парад дене эртыше ӱдыр-рвезе-влак Никонов лӱмеш площадьыште чумыргеныт. Нуным Марий Эл правительстве председательын икымше алмаштышыже М.Васютин, образований да науко министрН.Адамова, самырык-влакын политикышт, спорт да туризм министр Л.Батюкова, МарГУ-н, ПГТУ-н, МОСИ-н ректоржо-влак саламленыт. Михаил Васютин икымше курсышто тунемше-шамычлан символ сынан студент билетым кучыктен да шинчымашым налме корнышто у деч у кӱкшытым налаш тыланен. А нуныжо сайын тунемаш товатленыт.
Саламлымаш деч вара весела концерт программе лийын, тыгак билетым налше-влак коклаште лотерей модылтын. А кас велеш пайремыш чумыргышо-влакым тул шоу ӧрыктарен. Мероприятий тулсавыш дене мучашлалтын.
Л.ШАБДАРОВА.
М.Скобелевын фотожо.
