Школышто тунемше-влакын всероссийский олимпиадыштын пытартыш этапше мучашлалтын. Тудо 20 март гыч 30 апрель марте Российын 14 субъектыштыже эртен. Марий Эл гыч 21 ӱдыр-рвезе 14 предмет дене уш-акылжым терген. Нунын кокла гыч 12 тунемше 10 предмет дене призерыш да сеҥышыш лектын. Сеҥышын дипломжым Йошкар-Оласе 9-ше №-ан школын тунемшыже Мария Шерстневалан кучыктеныт. Тудо физический культур предмет дене всероссийский олимпиадыште икымше вер дене палемдалтын.
Рӱдоласе 28 №-ан лицейын тунемшыже-влак эн шуко призовой верым налыныт. Нуно ныл предмет дене призер коклаште лийыныт: Сергей Золотарёв (11-ше класс, экономике да математике), Екатерина Холодаева (11-ше класс, руш йылме), Евгений Ромах (10-шо класс, географий).
Бауман лицейын 10-шо классыштыже тунемше Игорь Петров ден Волжск оласе лицей гыч Руслан Сафин физкультур дене олимпиадыште призер радамыш логалыныт.
Моло призерын лӱмышт: Даниил Эскоскин (Козьмодемьянск оласе лицей, 9-ше класс, физике), Анастасия Коновалова (Бауман лицей, 11-ше класс, физике), Виталий Кардаков (Йошкар-Оласе 4-ше №-ан гимназий, 10-шо класс, ОБЖ), Евгений Чучалин ( Политехнический лицей-интернат, 11-ше класс, биологий), Павел Зыков ( Марий Турек район Косолап кыдалаш школ, 10-шо класс, технологий).
Призер ден сеҥыше-влакым эртыше арня мучаште Йошкар-Оласе 28-ше №-ан лицейыште саламленыт. Тыгодым Россий кӱкшытан олимпиадыште ойыртемалтшым гына огыл, а регионысо олимпиадыштат сеныше-влакым палемденыт. Тыгак эн шуко призерым ямдылыше школлан да туныктышо-влаклан Марий Элын Образований да науко министерствыжын Тауштымашыжым да кубокым кучыктеныт.
Тений эн шуко призерым рӱдоласе 28-ше №-ан лицей (29 еҥ) ямдылен. Кокымшо верыште – политехнический лицей-интернат (26 еҥ), кумшо верыште – Бауман лицей (21еҥ), селасе школла гыч Руэмысе шуко профилян лицей-интернат (7 еҥ) ойыртемалтын.
Л.ШАБДАРОВА.
