«Ростелеком» компанийын увертарымыж почеш, 1 июнь гыч таксофон гоч ик ола гыч вес олаш йыҥгыртымылан оксам тӱлыман огыл.
Тидыже элыште фиксироватлалтше телефон кылын кеч-могай номержым авалта. Компанийын пашаеҥже-влак умылат, таксофон эн ончыч калыкыште социальный функцийым шукта. Поснак нелын миен шуаш лийше яллаште тудо «кугу тӱня» дене кылым ышташ полшышо ик йӧн. Таксофон гыч ыштыме 20 процент йыҥгырже экстренный оперативный службылаш кая. «Ростелеком» компанийын президентше Михаил Осеевскийын ойлымыж почеш, ынде телефон карт деч посна таксофон гоч кеч-могай олаште илыше родо-тукым декат яра йыҥгырташ лиеш. Тиде компаний тачысе кечылан Российыште 148 тӱжем таксофоным обслуживатла, тыгай универсальный организацийже икте гына. Нуным 131 тӱжем илыме верыште вераҥдыме.
С.НОСОВА
