Электровийлан тарифым тӧрлымаш теме дене совещанийым почшыжла, Марий Эл вуйлатыше Александр Евстифеев тидын поснак ялозанлыклан кӱлешан улмыжым палемден.
— Тений уржа-сорла неле игечыште эртен. Шурным кошташ электровийым шуко кучылтмылан кӧра озанлык-влак кугу роскотыш пуреныт. А тидым ышташ огыл гын, тудым йомдарашат лиеш ыле, — каласен республикым вуйлатыше.
Электровийлан кугу тариф молымат тургыжландара.
— Мер транспорт дене лекше йодышат тидын денак кылдалтын. Электровийым пуышо-влак Марий Эл вуйлатыше ончылно эсогыл условийым шындаш тӧченыт — «Троллейбус транспорт» МП-н 4 миллион теҥге кугыт парымжым шӧрена манын, мутым пуаш йодыныт. Коммунал озанлыкыштат йодыш пӱсӧ. Кушто электровий кучылталтеш, шукыштыжо нелылыкым шижыт. Сандене роскотым тӧрлаш закон дене келшыше могай-гынат йӧным мауш кӱлеш, — кӱштен тидлан мутым кучышо-влаклан Александр Евстифеев.
Регионышто электровийлан тариф кугу улмо нерген йодыш ынде икымше гана огыл нӧлталтеш. Предприятий ден организаций-влаклан акым иземдаш лийме йӧным республикын промышленность, экономически вияҥмаш да торговльо министрже Дмитрий Пугачев темлен. Ик тыгай йӧнлан тудо опт рынкыште электровий акым иземдымым шотла.
Совещанийыште чыла тиде йодышым комплексно ончалаш кӱлмым палемдыме.
Ю.Исаков.
