Тыгай оҥай издер-влак дене курык гыч мунчалташ лиеш манын палымат огыл ыле! Медведево районысо Кугу Шап ялыште республик кӱкшытан «Лийдымат лийын кертеш» ойыртемалтше издер конкурс эртен. Тушко яра жапым пайдалын эртараш йӧратыше 14 команде миен, коктынжо Ульяновск ола ден Киров область гыч лийыныт.
Ты конкурсым «Конёк-Горбунок» тоштер-фермын озаже-влак Мария Суворова ден Иван Бабенко шонен луктыныт. Кокымшо ий почела тудым эртарат. А тений тушко ушнышо да ойыртемалтше-влакым палемдаш шийвундо дене полшышат лектын. Тӱҥ приз 20 тӱжем теҥге лийын. Медведево район администраций конкурсым эртарыме верым лум деч эрыкташ техникым ойырен.
Ты фермыште тыгай поро шӱлыш озаланыме шижалтеш. Тыште икмыняр имньым, казам, шорыкым, кроликым, ирсӧснам, эсогыл верблюдым ужаш лиеш. Ужаш веле огыл, ниялтен ончаш, пукшаш, пырля войзалташ. Шорык ден казаже, ай, почешет коштыт вара…
Курык гыч 14 тӱрлӧ издер волен. Нунын коклаште самолёт, пӧрт, вӱдыштӧ ийше пуш, пырыс пыжаш да молат лийыныт. Южо оза мунчалтыме издержым туге сӧрастарен, мом ончыктымыжым умылашат нелырак лийын, презентаций годым веле чылажат рашемын.
Россий УФСИН-ын регионысо управленийжын командыже «суртдымо-печыдыме» пырыс-влакын илышышт дене пеш раш палдарен, санденак «Эн сай презентаций» номинацийыште призым налын.
Йошкар-Оласе рӱдӧ тӱвыра да каныме паркын командыже «руш телылан» келшыше издер дене мунчалтен. Ӱдыр-рвезе-влакын чиемыштат пеш сылне лийын. «Амакс» фирмын командыже конкурслан лӱмын имньым кычкен кудалышташ келшыше кок олымбалан тарантасым ыштен.
Оршанке район гыч Коренковмыт еш, кум ватрушкым ушен, ӱмбакыже аза кроваткым келыштарен, уло еш дене мунчалтыме издерым конден. Кок икшывым шынден, вате-марий мунчалтен волышт. Тиде еш «Ончаш толшо-влакын призыштым» сеҥен налын.
Йошкар-Оласе «Изи патыр» йочасадын командыштыже ӱдыр-влак веле лийыныт. Издерыштымат нуно шке кидышт денак ыштеныт.
«Эн ойыртемалтше издер» номинацийыште Йошкар-Оласе 23-шо номеран школын 1-ше классыштыже тунемше-влакын «Бешеные папуасы» командыже сеҥен. «ВАЗ папуас» издерыштым ончен, шокшо элысе садерыш логалмыла чучын. Ох, кертыт вет изи папуас-шамычет! Йошкар-Оласе 53-шо №-ан йочасадын командыже издерым самовар семын сӧрастарен да «Эн писе издер» лӱмым сулен. Киров область гыч «Галактикын оролжо-влак» командын терже «Эн ойыртемалтшын мунчалтен волымаш» номинацийыште палемдалтын. А теве «Солнышко» йочапӧрт-интернатын «Патриот-влак» командыжым тора гычак ужаш да колаш лийын. Участник-влак шке элым йӧратымыштым вургемышт гочат ончыктеныт. Россий флагым кӱшнӧ кучен, шке манмыштла, «патриот» издерышкышт шинчын воленыт. Презентацийышт жюрилан да ончаш толшылан эн чот келшен, сандене нунылан «Калык издер» номинацийыште сеҥаш пиал шыргыжалын. Ты номинаций тений икымше гана лийын, а сеҥышым ончышо-влак шке ойыреныт.
Чаманен каласыман, чыла командыжак огыл курык вуй гыч мучаш марте мунчалтен волен кертын. Ала курыкшо иян, ала издержын куатше шагалрак лийын – неле каласаш. Южышт курык тайылыш шумо деч ончычак кумыкталтыныт.
Южиктыжын мунчалтен волымо годымак «шулдыржо» тодылалтын. Оршанке район гыч толшо командын самолётшо дене тыге лийын. Туге гынат «Эн кугу издер» номинацийыште лач тудо сеҥен.
Но эн тораш эн тора гычак толшо команде мунчалтен каен. Ульяновск гыч Ирек ден Рамиль Булатовмыт конкурс нерген интернет гоч пален налыныт да, шке манмышт почеш, еш машинашт сынанрак йошкар фургоным ныл кечыште ыштеныт.
Организатор-влакын палемдымышт почеш, вес ийын ты конкурс регион-влак кӱкшытан лийшаш.
Светлана Носова
Снимкыште: конкурсыш ушнышо команде-влак шке издерыштын куатыштым ончыктат.
Авторын фотожо.
