10 ноябрьыште Йошкар-Оласе Самырык-влак полатыште самырык-влакын регионысо национальный культур фестивальышт эртен. Оралте ик жаплан этно шӱлышан олаш, а Марий Элысе ссузлаште тунемше, тӱрлӧ эл гыч толшо студент-шамыч ик ешыш савырненыт ыле.
Кечывалвел кундемыште илыше калык-влакын тӱвырашт поснак кумдан ончыкталтын. Тушто Иран, Азербайджан, Узбекистан, Кыргызстан, Таджикистан, Армений, Туркменистан, Дагестан эллашет илыше калык-влакын йӱлашт сайын почылтын. Нунын вургемыштым, куштымашыштым ончаш, эсогыл сийыштым тамлен ончаш йӧн лийын.
Киргизий гыч рвезе-шамыч комуз национальный семӱзгар, камчы (лупш гай) нерген оҥайын каласкаленыт. Кумылан-влак комуз дене шокталтен онченыт. Индий гыч ӱдыр-рвезе-влак мотор вургемышт дене калыкын чонжым савыреныт.
Марий калыкын тӱвыраж дене палдарыше площадкат лийын. Марий кугыжаныш университетын книгагудыжо оҥай выставкым ямдылен. Тушко марий вургем, йӱлана нерген палдарыше оҥай экспонат-влакым чумырымо. Руш да Татар тӱвыра рӱдер-шамычын пашаеҥже-влак пырля муралаташ, тавалташ ӱжыныт.
А варажым «Самырык тукым келшымаш мурым муралта!» концерт шке йырже эшеат шуко еҥым чумырен. Тушто фестивальыш мийыше да Марий Элыште илыше калык-влак поян тӱвырашт дене лишкырак палымым ыштеныт.
Пайремыш мийыше-влакым Марий Эл вуйлатыше Александр Евстифеевын лӱмжӧ дене республикын Правительстве председательын икымше алмаштышыже, Тӱвыра, печать да калык-влакын пашашт шотышто министр М.Васютин саламлен.
А фестивальын программыже 11 ноябрьыште шуйнен. Оршанке поселкышто самырык-влакын интернациональный десантышт эртен. Тушто республикыштына илыше тӱрлӧ калык дене палдарыше концерт лийын. Десантыш ушнышо ӱдыр-рвезе-шамыч Оршанке районысо кресаньык илышым ончыктышо тоштерыш миеныт.
Л.ШАБДАРОВА.
М.Скобелевын фотожо.
