Йошкар-Оласе православный рӱдерыште пӱтӧ кочкыш фестиваль-конкурс эртен.
Тудым Молодёжный политике, спорт да туризм министерствын, Йоча да самырык-влакын творчестве полатыштын полшымышт дене Йошкар-Ола да Марий епархий эртарен. Кокымшо ий почела фестивальыш уна семын Москвасе Данилов монастырьын еҥже, «Кухня батюшки Гермогена» телепередачын да книган авторжо игумен Гермоген толын.
Фестиваль почылтмо деч ончыч Йошкар-Оласе торгово-технологический колледжын студентше-влак пӱтӧ кочкышым ямдылыме мастер-классым эртареныт. Кызыт православный-шамычын Кугече деч ончыч пӱтым кучымо пагытышт эрта. Сандене тыгай кочкышым ямдылаш кӱлешлыкшат уло. Участник-влакын мастарлыкыштым аклаш эсогыл оласе ик ресторанын представительжымат ӱжыныт ыле. Темлыме кочкышлан кажныже шкенжын презентацийжым ямдылен. Почеламут, муро йоҥгалтыныт, тӱрло семӱзгар денат шоктеныт. Аклышыже участник-шамычак лийыныт, шке йӱкыштым нуно келшыше блюдылан пуэныт. А ойыртемалтше-влакым тӱрлӧ номинацийыште палемденыт.
Икымше верыш торгово-технологический коледжын студентше-влак лектыныт, кокымшо Йошкар-Оласе Христосын шочмыжлан храмын приходшо, кумшо Семеновкыо Пресвятой Юмым шочыктышо Аван рушарня школжо лийыныт. Ончаш толшо-влакымат конкурслан темлыме кочкыш дене сийленыт.
С.Носова.
